طب بالعامية

أنت عندك برد؟!

Advertisements

أكثر حاجة بتعرضنا للإحراج كأشخاص بنعاني من حساسية الأنف هي بصة الناس لينا كأننا مصدر عدوى متنقل ، لإن حساسية الأنف ممكن تكون مشابهة في أعراضها للبرد زى -سيلان الأنف -احتقان الأنف -سعال -احمرار العينين -إرهاق لكن السبب مختلف تماما.

البرد هو عبارة عن عدوى فيروسية غالبا أو بكتيرية ، أما الحساسية فسببها إن جهازنا المناعي بيعامل الجزيئات الغير ضارة اللي ممكن نتعرضلها على إنها جسم ضار زي الفيروس أو البكتيريا ، فيبدأ يحاربها و يفرز مادة الهيستامين و اللي بتسبب أعراض الحساسية.

طيب ايه العوامل اللي ممكن تزود احتمال إننا نكون من تعساء الحظ اللي عندهم حساسية أنف و امتى الأعراض بتزيد؟

لو كنت بتعاني من نوع حساسية آخر زي حساسية الصدر أو الاكزيما ؛ عوامل جينية بمعنى إن يكون حد في الأسرة عنده حساسية أنف ، التعرّض بكثرة لمثيرات الحساسية دي ( الغبار، ريحة السجائر ، حبوب اللقاح ، وبر الحيوانات ) زي الأشخاص اللي بيئة عملهم بتخليهم يتعرضوا للحاجات دي بشكل مستمر ، ساعات التغير المفاجئ في درجات الحرارة بيثير أعراض الحساسية فحنلاقي بعض الأشخاص الأعراض بتزيد عليهم الصبح أول ما يصحوا من النوم أو لو كانوا في مكان مكيف و بعدين خرجوا لمكان درجة حرارته أعلى.

عشان نقلل من الأعراض دي نحاول بقدر الإمكان نتجنب المثيرات و طبعا مضادات الحساسية و بخاخات الكورتيزون الموضعية هي خيارات علاجية فعالة لتخفيف الأعراض

شاركوا البوست مع أي حد تعرفوه بيعاني من حساسية الأنف و طمنوه إنه مش لوحده.

دمتم سالمين و أصحاء.

Advertisements
زر الذهاب إلى الأعلى