طب بالعامية

اختبار حساسية المضاد الحيوى

الأول ايه هي الحساسية و بتحصل ليه؟

الحساسية دي بتبقى عبارة عن استجابة مناعية ضد الدواء اللي داخل للجسم ، و دا شيء غير طبيعي مش المفروض يحصل ، و لكن الجهاز المناعي بيقرر يشوف الدواء اللي داخل له دا على إنه جسم ضار ( زي الفايرس أو البكتيريا ) و بيقرر يهاجمه.

العملية دي بتفرز فيها مواد كيميائية ( الهيستامين ) هي المسؤولة عن أعراض الحساسية. الموضوع دا ممكن يحصل من أي دواء و لكن في أدوية بتعمل كدا أكثر من غيرها زي بعض المضادات الحيوية و أشهرها البنسلين ( حساسية البنسلين ).

البنسلين ينتمي إلى عائلة من المضادات الحيوية اسمها “البيتا لاكتام” و دي عائلة كبيرة فيها مضادات حيوية أخرى ، لذلك لو حد عنده حساسية من البنسلين احتمال تجيله حساسية من مضادات حيوية تنتمي إلى نفس العائلة.

ايه هي المضادات الحيوية دي؟ -البنسيلينات الأخرى الأحدث زي: -أمبيسيلين ( يونيكتام )، -أموكسيسيلين و فلوكلوكساسيلين ( فلوموكس )

المضادات الحيوية من عائلة السيفالوسبورن زي: -سيفترياكسون ( سيفاكسون و مثايله )، -سيفتازيديم ( فورتم و مثايله )، -سيفوتاكسيم ( سيفوتاكس و مثايله )

أعراض الحساسية في الحالات البسيطة تشمل: -طفح جلدي أو حبوب حمراء على سطح الجلد، -حكة في الجلد، -تورم، -كحة أو عطس أو أزمة صدرية حكة أو احمرار في العين، -سيلان في الأنف، -ارتفاع في درجة الحرارة

في حالات بتوصل فيها الحساسية لحالة شديدة اسمها الصدمة التحسسية ( anaphylactic shock ) و دي بتكون أعراضها أخطر: -قيء أو إسهال، -زيادة نبضات القلب، -انخفاض ضغط الدم، -دوخة و قد تصل لفقدان الوعي

يمكن علاج أعراض الحساسية بمضادات الحساسية و الكورتيزونات ، أما في حالة الصدمة التحسسية فلازم يتم التعامل معاها في مكان مجهز ( مستشفى ).

لو عندك حساسية من البنسيلين لازم تعرف الطبيب/الصيدلي.

اختبار الحساسية بيكون عبارة عن حقن جزء صغير من الجرعة تحت الجلد و الانتظار لمدة تتراوح من ١٠-١٥ دقيقة ؛ في حالة ظهور احمرار و حكة في الجلد فدي نتيجة إيجابية تشير إلى احتمالية حدوث حساسية من هذه الجرعة.

شاركوا البوست مع صحابكم و دمتم سالمين و أصحاء.

اترك تعليقاً

زر الذهاب إلى الأعلى