طب بالعامية

قرح الفم

Advertisements

هي قرحة صغيرة لونها أبيض في المنتصف و حمراء في الأطراف و بتكون دائرية أو بيضاوية الشكل و بتكون مؤلمة بالذات أثناء الأكل و بتظهر تحت اللسان أو داخل الشفتين أو الخدين أو على قاعدة اللثة و بتقعد من أسبوع لأسبوعين و بتروح لوحدها و مفيش منها مشاكل خالص ؛ مشكلتها الوحيدة هي الألم اللي قد يسبب إزعاج للبعض.

طيب هي بتحصل ليه؟

مفيش سبب محدد و لكن فيه بعض العوامل: أي إصابة داخل الفم زي مثلاً لو حد عض لسانه أو عض خدّه ، أيضًا فرشاة الأسنان أو الأدوات المستخدمة في عيادات الأسنان قد تحدث إصابات طفيفة داخل الفم ، عوامل جينية الناس اللي عندها حد في أهلها بتجي له قرح كثير حيكون أكثر عرضة للإصابة بالقرح ، التغير الهرموني أثناء فترة الحيض ، التوتر النفسي ،وكمان نقص بعض العناصر الغذائية زي فيتامين ب١٢ و الفوليك أسيد و الحديد و الزنك.

زي ما قلنا قرحة الفم مشكلة بسيطة و بتروح لوحدها ممكن فقط استخدام جيل مخدر موضعي لتخفيف الألم ( زي اوراكيور جيل ) وممكن برضو نعمل الحاجات دي كإجراءات وقائية لو الموضوع بيتكرر كثير: نحاول نقلل من الأطعمة التي قد تسبب تهيج للفم زي التوابل و الأكل المالح و الفواكه الحمضية ( البرتقال، الليمون ) ناكل أطعمة غنية بفيتامين ب١٢ و حمض الفوليك و الزنك و الحديد و (الفواكه و الخضروات ) ، المحافظة على نظافة الفم و غسل الأسنان بانتظام و استخدام فرشاة أسنان ناعمة لو اللثة حساسة ؛ و طبعًا نحاول نخفف من الضغط النفسي و نحظى بقدر كافي من النوم.

طبعا الكلام ده يخص قرح الفم البسيطة ، في حالة ان القرحة استمرت اكثر من ٥ أيام او كانت غير مؤلمة او صاحبها ظهور غدد ليمفاوية بالوجه او الرقبة او نزول للوزن او اعراض عامة تدل على تغير الصحة فلابد من مراجعة الطبيب لاستبعاد انواع أخرى خطيرة.

و دمتم سالمين و أصحاء.

Advertisements
زر الذهاب إلى الأعلى