السلام عليكم ورحمة الله وبركاته
قعدت وقت طويل أفكر أكتب عن ايه واختيار الموضوع شيء بالنسبة لي أشوفه صعب فممكن بعد كدا ان شاء الله قبل ما أبتدي في كتابة موضوع أعمل استفتاء صغير كدا تشاركونا فيه كالعادة تختاروا فيه موضوع الشهر من بين مواضيع أكون محتار ايه ممكن يفيدكم أكتر.
وبما اني قضيت وقت كتير في التفكير فالمرة دي هستأذنكم هكتب في موضوع انا شخصيا اتعرضت لشيء مشابه له في الفترة الأخيرة.
اذا انت فوق سن ال 18 سنة ولم تصنف بعد من كبار السن (بلاش الابتسامة دي وما تفهم غلط ) وعمرك ما قست ضغطك ولا مرة. ركز معايا اذا كنت :
· بتدخن.
· عندك سمنة او زيادة وزن.
· اعمالك مكتبية وقليل الحركة وبتبعت حد يجيب لك ريموت التليفزيون زي حالاتي.
· عندك في اسرتك حد بيتعالج من ضغط الدم المرتفع.
· بتتعالج من اي مرض مزمن زي مثلا مرض السكرى .
· طول ما انت ماشي عمال تاكل اكل جاهز مليء بالصوديوم.
واذا حتي مش عندك كل ده فركز معايا برضه لانك اكيد تعرف حد يهمك وعاوز تفيده بأي معلومة.
من قبل سنوات كانت المنظمات العالمية المعتمدة المهتمة بأمراض ضغط الدم تقسم الناس الي قسمين :
· مريض بضغط الدم المرتفع فيبتدى له علاج اذا كان ضغطه الاول (الانقباضي) وده الرقم اللي فوق وده بيقيس الضغط في شرايينك لما يدق قلبك اكتر من 140 ملليمترا زئبقيا (مم زئبق) او ان ضغطه الثاني (الانبساطى) وده الرقم اللي تحت وده بيقيس ضغط الدم قي شرايينك ما بين دقات قلبك ودى الفترة نفسها اللي بتتغذي فيها عضلة القلب يكون اكثر من 90 ملليمترا زئبقيا (مم زئبق) او ان الاتنين مع بعض يكونوا مرتفعين فوق الارقام دى وده يبتدى علاج غير دوائي مع او بدون علاج دوائي.
· أما الإنسان الطبيعي ضغوطه الاثنين تحت الارقام المذكورة دي.
بس للأسف مع الوقت نفس المنظمات دي اكتشفت بناءا علي دراسات قعدت سنين ان فيه مجموعة من الناس الاصحاء من القسم الاول بيكون ضغطهم اعلي شوية من غيرهم بيصابوا بمرض فرط ارتفاع ضغط الدم مع الوقت فظهر ما يعرف بمصطلح ” ما قبل ارتفاع ضغط الدم”.
ما قبل ارتفاع ضغط الدم هو ان الضغط الانقباضي يتراوح ما بين 120 الي 139 مم زئبق أو ان الضغط الانبساطي يتراوح ما بين 80 الي 89 مم زئبق وفي الغالب بيتم اكتشافه بالصدفة أثناء كشف عند طبيب لسبب اخر او حتي قياسه في صيدلية ، وعلي فكرة حتي مرض ضغط الدم المرتفع بذات نفسه في اغلب الاحيان ماله اعراض وبيتم اكتشافه صدفة وده بيخلي كتير من الناس للاسف تيجي بمضاعفاته بعد كدا بدون ما تكون عارفه اصلا ان عندها فرط ارتفاع ضغط الدم.
عوامل الخطورة المرتبطة بظهور ما قبل ارتفاع ضغط الدم او ضغط الدم المرتفع قلناها فوق بس نعيدها لان في الاعادة افادة :
· التدخين.
· النساء بعد سن 65 سنة والرجال في منتصف العمر. النساء طول ما عندها الدورة الشهرية هرمون الاستروجين شغال وبيحمي القلب والشرايين وبالتالي بيكونوا اقل عرضه لامراض القلب وضغط الدم المرتفع .
· اصحاب البشرة السوداء ، للاسف الناس دي بيبقي عندها النظام اللي بيحافظ علي ضغط دمنا اذا لا قدر الله انخفض ونسبة الميه في دمنا اذا لا قدر الله قلت لاي سبب نشيط اكثر من اللازم فالدراسات اكدت ان ذوي البشرى السمراء بيجيلهم ضغط اكتر وفي سن اصغر من اصحاب البشرة البيضاء.
· تاريخ عائلي بالاصابة بضغط الدم المرتفع في الاسرة الواحدة يعني اذا الاب او الام او الاخ او الاخت.
· زيادة الوزن والسمنة وقلة الحركة ، نداء الي اصحاب الكروش المتينة ، نزل كرشك لو سمحت مش تشفطه لا نزله بالرياضة والنظام الغذائي الصحيح زى الفواكه والخضراوات كتير ، كربوهيرات ودهون اقل (راجع الجروب عن موضوع الدايت).
الموضوع بسيط اذا كتلة جسمك زادت فانسجتك هتحتاج اكسجين اكتر فالدم هيندفع في شرايينك بشكل اقوي ويبقي فيه ضغط اكبر علي جدران شرايينك والجدران دي مش هتسكت لازم تنشف كدا وتسترجل في مواجهة الضغط ده وبالتالي يحصل تصلب الشرايين وبعدين الضغط يبدأ يعلى.
· النظام الغذائي كثير الملح (الصوديوم) ، العالم كله رايح دلوقت في سكة ان حتي الميه تبقي قليلة الصوديوم.
· بعض الامراض المزمنة زي امراض الكلى والسكرى او انقطاع النفس اثناء النوم او امراض الغدة الدرقية (غدة بالرقبة تفرز هرمون النشاط) او الكظرية (غدة فوق الكلي بتفرز مجموعة مهمة من الهرمونات منها الكورتيزون) او تصلب الشرايين نتيجة الدهون الزايدة.
· بعض الادوية اللي بتستخدم بدون اي وعي زي مسكنات الالم ومضادات الاحتقان ، ومن الادوية المشهورة كمان حبوب منع الحمل .
السؤال المهم ليه مهم اكتشاف مرحلة ما قبل ارتفاع ضغط الدم ؟؟؟
الحقيقة ان ما قبل ارتفاع ضغط الدم لا يسبب مضاعفات انما هو جرس انذار لتغيير نظام الحياة الي نظام صحي والا بيتطور الي فرط ارتفاع ضغط الدم وممكن بدون ما يشعر الشخص يدخل في مضاعفات ارتفاع ضغط الدم من نوبات قلبية وفشل القلب والسكتة الدمغية والفشل الكلوي.
نصيحتي لك
· بطل تدخين .
· العب رياضة او اتحرك .
· كل صح وقلل الملح.
· حافظ علي وزن صحي او نزل وزنك.
· الدوا اللي تاخده باشراف طبيب.
· قيس ضغطك كل سنتين مرة لو ما عندك ما قبل ارتفاع ضغط الدم ولو عندك او عندك اي مرض مزمن خلي القياسات متكررة علي فترات متقاربة.
اذا عجبك الموضوع دوس لايك وشاركه واذا ما عجبك قلنا اقتراحك عشان يعجبك المرة الجاية
