✔ قبل ما نشرح أدوية الاكتئاب خلونا نقول بسرعة كدا ايه اللي بيحصل أثناء الاكتئاب أو ايه التفسيرات البيولوجيّة ليه..
لازم نكون عارفين إنّ الاكتئاب شيء معقّد مش معتمد بس على سبب واحد واضح.. بل فيه أسباب كثير مُتداخلة.. أسباب جينيّة و أسباب بيئية و تربويّة و أسباب متعلقة بضغوطات الحياة اللي بيواجهها الإنسان و أخيراً أسباب بيولوجية..
أحد التفسيرات البيولوجية المطروحة هي إنّ الاكتئاب بيحصل نتيجة نقص في النواقل العصبية في المخ بالذّات مادّة السيروتونين.. و من هنا بدأنا نبحث عن أدوية ترفع مستوى السيروتونين في المخّ و جاءت أدوية الاكتئاب..
✔ أدوية الاكتئاب نفسها متقسّمة مجموعات كثير مش حنثقّل عليكم بالكلام عن كل واحدة فيهم بس حنقول أهمّ ٣ مجموعات بيستخدموا دلوقتي:
???? مثبطات استرداد السيروتونين الانتقائية..
ما تشتغلوش بالكم بالاسم المعقد المهم إنّ طريقة عمل المجموعة دي زي ما قلنا من شوية.. بترفع مستوى السيروتونين.. و لإنّ شغلها انتقائي على السيروتونين أكثر من المجموعات القديمة فأعراضها الجانبية أقلّ و استخدامها أأمن و لذلك هي الاختيار الأول.. و منها أدوية آمنة للاستخدام في الأطفال و المُراهقين..
بعض أفرادها:
???? فلوكسيتين
???? سيتالوبرام
???? ايسيتالوبرام
???? باروكسيتين
آثارها الجانبيّة:
???? قيء و غثيان
????صداع
???? نعاس
????زيادة الوزن
????مشاكل في الرغبة الجنسية
???? المجموعة الثانية هي مثبطات استرداد السيروتونين و النّور إبينيفرين..
شبه الأولى أيضًا.. و مفيدة في حالات الاكتئاب المُصاحَب بألم جسدي..
بعض أفرادها:
???? فينالافاكسين
???? دولوكسيتين
آثارها الجانبيّة:
???? قيء و غثيان
???? نعاس و دروخة
???? مشاكل في الرغبة الجنسية
???? المجموعة الثالثة هي مضادات الاكتئاب الحلقيّة..
و دي مجموعة أقدم شوية من اللي فاتوا و لذلك في الأغلب مش بنبدأ بيها ( شغلها أقلّ انتقائية )
بعض أفرادها:
???? ايميبرامين
???? كلوميبرامين
آثارها الجانبيّة:
???? جفاف في الفم
???? زغللة في الرؤية
????زيادة في الوزن
???? نعاس و دروخة
✔️ التعامل مع الآثار الجانبيّة:
زيّ ما قلنا المرّة اللي فاتت الآثار الجانبيّة مش بتحصل لكلّ النّاس و لمّا بتحصل حدّتها بتختلف من شخص لشخص و في الغالب بتخفّ مع الوقت..
???? في الغالب الطبيب بيبدأ معانا الدواء بجرعات صغيرة و بعدين بيزوّد الجرعة واحدة واحدة عشان يقلّل الآثار الجانبية..
???? في حاجات ممكن احنا نعملها..
???? زيّ ممارسة الرّياضة و اتباع نظام غذائي صحي لتجنب زيادة الوزن..
???? الاهتمام بشرب كمية كبيرة من الماء لتجنب جفاف الفم..
???? مراعاة عدم النهوض فجأة لتجنب الدوخة و الدوار..
✔️ في سؤال دائمًا يُطرح و هو هل فعلاً مضادات الاكتئاب بتزوّد الأفكار الانتحاريّة و نسبة الانتحار..؟
الجواب مش آه و لا لأ.. حنشرح شوية.. احنا قلنا إنّ الاكتئاب عملية معقدة و ليه أعراض كثير غير مجرد الشعور بالحزن أو اضطراب المزاج.. من أعراض الاكتئاب نفسه الأفكار الانتحارية.. و كمان التعب و عدم القدرة على القيام بالأنشطة اليومية المعتادة..
فأحد التفسيرات بتقول إنّ دا بيحصل لإنّ لمّا بناخذ مضادات الاكتئاب أول عرض بيبدأ يتحسن معانا هو الطاقة و النّشاط مش المزاج.. فبيبدأ الشخص يحس إنه نشيط و عنده قدرة على العمل و الإنجاز بس لسة مزاجه مش متضبّط و بالتّالي لسة أفكاره زيّ ماهي.. فعشان كدا بنخاف إنّ التعب اللي كان ممكن يكون هو المانع من تطبيق الأفكار دي راح..
ممكن نتغلب على الموضوع دا بإنّنا نزاوِج ما بين أخذ الدّواء و جلسات العلاج النّفسي و نحاول نخلي البيئة الأُسريّة للشّخص داعمة..
✔️ آخر حاجة نعرفها هي إنّ الدواء مش سحر و لكن مهمّ جدًّا.. الدّواء زيّ الأكل اللي بيدّينا طاقة عشان نلعب رياضة مثلاً.. لكن لو احنا كسّلنا نمارس الرّياضة الأكل دا مش حيفيدنا.. و في نفس الوقت لو كنا بنمارس الرياضة من غير ما ناكل كويس حنتعب و مش حنقدر..
و بالمِثل ما ينفعش دواء من غير ما نغيّر احنا أفكارنا و نظرتنا للعالم و أسلوب حياتنا و في نفس الوقت مش حنقدر نعمل كدا من غير دواء..
و ما ننساش نتّبع تعليمات الطّبيب لو فيه أي تحاليل مطلوبة لمُتابعة نسب الدّواء في الدّم أو لمتابعة وظائف الكلى أو الكبد و مانوقّفش الدّواء فجأة لإنّه بيقف بالتّدريج و بالطّبع تحت إشراف الطّبيب..
شاركوا البوست مع أصدقائِكُم و عائلاتِكُم و دمتم بألف صحة و عافية.. ????????
