تريندنج في الطبفيديوهات طبية

هل لقاح كوفيد يحمي من السلالة الجديدة أوميكرون؟

بعض المصادر المفيدة لفيديو “هل لقاح كوفيد يحمي من السلالة الجديدة أوميكرون” – “فعالية اللقاحات مع المتحور الجديد”:

Coronavirus cases in South Africa – Worldometer

Tracking SARS-CoV-2 variants – WHO

Classification of Omicron: SARS-CoV-2 Variant of Concern – WHO

Why is new Covid variant called Omicron? Meaning of Greek alphabet letter

New Covid variant: South Africa’s pride and punishment


نص فيديو “ما يجب أن تعرفه عن السلالة الجديدة أوميكرون – هل سيتم إغلاق بلاد عربية مثل ما حدث مع جنوب أفريقيا؟”:

(أرجو ملاحظة أن النص مكتوب بالعامية المصرية كما تم نشره بالفيديو)


هل لقاح كوفيد يحمي من السلالة الجديدة أوميكرون - فعالية اللقاحات مع المتحور الجديد
هل لقاح كوفيد يحمي من السلالة الجديدة أوميكرون – فعالية اللقاحات مع المتحور الجديد

الهدف من الفيديو مش اننا نخاف. الهدف اننا نتفق نعمل ايه عشان ننتهي من المشكلة اللي العالم كله فيها دي.. وعشان ماتقعدش تقلق كل ماتسمع اسم سلالة جديدة من الفيروس

جنوب افريقيا اتقفلت وكل العالم منع السفر منها واليها..

وحكومتها بتقفل البلد وبتاخد اجراءات طوارئ..

هل ده ممكن يبدأ يحصل في بلاد أفريقية أو عربية تانية؟

هل سلالة أوميكرون موجودة في بلاد عربية حالياً واحنا مانعرفش؟

هل الموضوع أصلاً يفرق معانا؟

مااحنا اتعودنا على كورونا وعايشين معاه..

هو كل ما يكتشفو سلالة هنقلق او نقفل البلد

وانا اطلع اعمل فيديو وحضرتك تسيب شغلك وحياتك وتقعد تدور ايه الحكاية ومين هو المتحور الجديد؟

المطلوب النهاردة اننا نتفق على كلمتين من العلم الخالص اللي مفيش فيهم آراء شخصية عشان كلنا نرتاح

وخليني الأول أقول لك إيه اللي حصل في جنوب افريقيا

غالبية شعب جنوب افريقيا مش مهتم باللقاح..

اقل من ربع الشعب اتطعم بسبب حملات التخويف على السوشيال ميديا ليل ونهار..

وحتى على شاشات تليفزيون الدولة أحياناً

وبعد ما كانت الأمور هدت والحالات اليومية قلت بعد مرور الموجة الثالثة

فجأة الحالات تضاعفت بسرعة جداً خلال آخر أسبوعين

والعلماء يكتشفوا الجينوم بتاع سلالة جديدة فيها تغيرات جينية -خلي بالك – ممكن تأثر على قدرة اللقاح على مقاومة المرض

وكمان ممكن تأثر على قدرات الفيروس نفسه وشدته أو قدرته على الانتشار وسرعته

تغييرات جينية خاصة بالمكان بتاع التصاق الفيروس في البلعوم والمكان بتاع مقاومة الأجسام المضادة أو اللقاحات

وده يفسر اللي حصل في جنوب افريقيا من ارتفاع سريع في الحالات

وتتولد السلالة أوميكرون .. بعد ألفا وبيتا وجاما ودلتا ودلتا بلس وميو (وماتسألنيش ليه أوميكرون رغم انه الحرف رقم 15 في ترتيب الحروف اليونانية وليه سابوا حروف تانية لأن ده له قصة ظريفة هسيب لك رابط لها في المصادر لو حابب تقرأها)

وتذوق جنوب أفريقيا طعم ظهور سلالة جديدة

الدول تقفل أبوابها وتمنع وصول الناس منها (ومن الدول اللي حواليها)

وتمنع السياح اللي رايحين لها وده طبعاً هيقتل السياحة هناك

والحكومة تاخد اجراءات طوارئ واحتمال البلد كلها تقفل والاقتصاد يقع والناس بيوتها تتخرب

وخلي بالك..

للأسف هو ده نفس اللي حصل في شهر مايو السنة اللي فاتت معاهم لما اكتشفوا السلالة بيتا برضه في جنوب أفريقيا

واتقفلت البلد واتخرب الاقتصاد واتخربت البيوت..

طيب.. هل هو بس موجود في جنوب أفريقيا؟

لأ طبعاً!

هو اتمسك في جنوب أفريقيا (أول جينوم وبي سي آر) لكن دلوقت فيه دول كتير بدأت تكتشف حالات ولحظة تصوير الحلقة أعلن عنه في أستراليا وكندا وهولندا وإيطاليا وألمانيا وبريطانيا وهونج كونج وبتسوانا وبلجيكا و سويسرا ولسه..

بعضهم فعلاً السلالة اتشخصت في مسافرين جايين من جنوب أفريقيا أو دول مجاورة في جنوب قارة أفريقيا

لكن كمان أنا عايز أقولك حاجة

هل اوميكرون بدأ فعلاًً في جنوب افريقيا؟

احتمال كبير انه لأ!

زي ما السلالة بيتا ما اكتشفت في جنوب افريقيا من حوالي سنة وغالبا كانت جاية من برة

لكن لأن جنوب أفريقيا هي أكثر دولة في المنطقة بتعمل تحاليل كوفيد وبتعلن على الملأ.. فهي اللي بتتلط كل مرة

عشان كده هتسمع علماء بيقولو:

“جنوب إفريقيا هي أكثر دولة في افريقيا تقوم بعمل التحاليل على أوسع نطاق

لديها شبكة تتبع جيدة جدا وأعتقد أن علماء جنوب إفريقيا قاموا بعمل رائع هنا”

طيب إيه المطلوب.. حضرتك أو حضرتك دورك إيه؟

أنا مش بتكلم عن دور الدول اللي المفروض إنها تعمل التحليل أكتر وتخليه متاح لكل الناس.. وتعمل البي سي آر وتحلل جينوم الفيروس وتنشره في مكان عام أونلاين بحيث العالم كله يوصل له زي ما عملت جنوب أفريقيا

وفيه قواعد بيانات عالمية الكل متاح له يضيف لها ومعروفة للكل زي

GISAID

لكن أنا بتكلم عن دورك انت أو إنت

طبعا تخلي بالك من احتياطاتك العادية وتدعي ربنا ….

وتاخد اللقاح

وده ياخدنا للسؤال المهم:

هل لقاح كوفيد يحمي من السلالة الجديدة أوميكرون – فعالية اللقاحات مع المتحور الجديد

طبعاً دي منطقة بحث وهتظهر خلال الفترة الجاية ان شاء الله .. لكن إجمالاً .. غالباً أيوة ان شاء الله على الأقل بنسبة لأن

  • أولاً الطفرات الحاصلة في أوميكرون لن تمنع اللقاح تماماً من العمل لأن كتير من بروتينات الفيروس لازالت زي ماهي
  • ثانياً.. خد اللقاح لأن اللقاح أكيد بيحمي من السلالات التانية … وهي دي المنتشرة حالياً في العالم كله واللي ممكن توصلك وتؤذيك لا قدر الله
  • ثالثاً.. لو الناس كانت كلها اخدت اللقاح ما كانش ده غالباً حصل أصلاً

المشكلة ان البلاد اللي الناس مش بتاخد فيها اللقاحات بتنتشر فيها الفيروسات وبتتكاثر وبتتحور براحتها.. وبعدها تنطلق منها للعالم كله.

وعشان خاطري ماتكتبليش في التعليقات ان ما عندك انجلترا اهو فيها حالات كتير رغم اللقاح!
لأن فيه معلومتين مهمين أحب أنقلهم لك:

أولاً: ماعندناش حالات كتير في المستشفيات.. الأرقام اللي بنسمعها دول مرضى كوفيد في البيوت أغلبهم حالتهم بسيطة.

ثانياً: البلد اتفتحت والمستشفيات خف من عليها الضغط وبنعمل عمليات وبنقابل المرضى وبنشوفهم بفضل الله ثم اللقاحات.

أنا عارف ان حضرتك ممكن حضرتك تكون مصدق انصاف المتعلمين اللي بيطلعوا في كل حتة يقولولنا ان كورونا مؤامرة واللقاح فيه سم قاتل.. حضرتك حر..

لكن انا وانت شئنا ام ابينا.. بلادنا هتتقفل وهنتمنع من السفر وفيه ناس هتفقد شغلها بسبب اكتشاف سلالات جديدة ممكن تهرب من اللقاح او تكون سريعة الانتشار او عالية الخطورة

الموضوع مش هزار

اتكلمت كتير قبل كده في أهمية اللقاح وازاي بيشغل وأنواع اللقاحات ومين أفضل من مين ومين ينفع ياخده ومين لأ..

والكلام العلمي المحترم موجود في كل مكان لو حضرتك حابب تقرا وتدور في المواقع العلمية الموثوقة..

مش عند نصابين السوشيال ميديا وأنصاف المتعلمين

أشوفكم على خير الفيديو الجاي

د.محمد منصور

دكتور محمد منصور طبيب الباطنة والكلى مستشفيات جامعة ليستر - بريطانيا مؤسس قناة و موقع الدكتور

اترك تعليقاً

زر الذهاب إلى الأعلى