محتوى المقال
مؤمن قابل عم حكيم وسأله عن أشكال الفطر الأسود ؟
مؤمن خلص شغله وهو مروح بيته قابل عم حكيم فسلم عليه وسأله عن أشكال الفطر الأسود اللي كل الناس خايفة منه
فعم حكيم قال له يا مؤمن ده مرض نادر سبحان الله وتخاف منه ليه
ده ربنا سبحانه وتعالى قال في كتابه العزيز ﴿قُل لَن يُصيبَنا إِلّا ما كَتَبَ اللَّهُ لَنا هُوَ مَولانا وَعَلَى اللَّهِ فَليَتَوَكَّلِ المُؤمِنونَ﴾ [سورة التوبة: ٥١]
وكمان النبي صلى الله عليه وسلم قال " مَا أَنْزَلَ اللَّهُ دَاءً إِلَّا أَنْزَلَ لَهُ شِفَاءً " [صحيح البخاري: 5678]
عم حكيم قاله عارف إيه هو الفطر أصلاً حقولك ؟
- عارف لما تسيب حاجة بره مكشوفة وتلقيها عفنت أيوه هو ده الفطر بتلاقيه في كل حتة وخصوصاً الزرع والسماد وروث الحيوانات والخشب المتعفن
- وبيكون فيها أكتر من الهواء وفي الصيف والخريف أكتر من الشتاء والربيع وصعب تتجنبه وممكن تشم ريحته الوحشة كمان وده معناه إنه طول عمره موجود ومش حاجة جديدة يعني
>>> اقرأ أيضًا: حفظ الطعام بأمان يحميك من 200 مرض
مؤمن سأل عم حكيم إزاي أخلي بالي من كل أشكال الفطر الأسود ؟
عم حكيم قال له أهم حاجة تعملها يا مؤمن عشان تخلي بالك منه هي
- النظافة ولازم تغسل إيدك دايما بالماء والصابون وكمان تلبس الكمامة وخصوصاً في الأماكن المغلقة والملوثة
- ولو رايح أماكن فيها بُنى وجناين أحسن لك كمان تلبس جوانتي وقميص بكمام طويلة وبنطلون وشوز بوت وكل ده وقاية لك
>>> اقرأ أيضًا: 14 نصيحة طبية
عم حكيم قال لمؤمن حقولك بتيجي إزاي أشكال الفطر الأسود ولمين ؟
لكن يا مؤمن لازم تعرف إن المرض ده أصلاً مش معدي من شخص للتاني ومابيجيش لأي حد سليم إلا
- لا قدر الله في الكوارث زي الزلازل والأعاصير عشان الناس السليمة الصحيحة بتتعرض بشكل مباشر للتلوث من المياه والتربة
- وبيدخل لهم في الغالب عن طريق الإستنشاق بالأنف أو الفم أو العينين
- لكن الطريقة الأقل عن طريق جرح في الجلد
- لكن بالنسبة لمرضى المناعة الضعيفة ونقص كرات الدم البيضاء والسكر اللي مش مضبوط ده وبيسموه غير المنضبط وطبعا بيجيلهم تقرحات القدم ،
- وكمان مرضى الحروق وإستئصال الطحال والأورام الخبيثة وزرع الأعضاء والأدوية اللي بتشيل الحديد الزائد في الجسم
- وكمان اللي بتوقف عمل المناعة فدول بقى هم الأكتر عرضه له
- عشان كده ممكن يجي لمرضى الإيدز والسرطان وكورونا والعلاج بالكورتيزون بشكل مبالغ فيه ومش دول وبس ده فيه ناس كمان تاني غيرهم
مؤمن قال له وهو فعلاً أشكال الفطر الأسود 5 ؟
عم حكيم قال له أيوه يا مؤمن أشكال الفطر الأسود ده 5 أشكال وفي كمان أنواع نادرة :
- الأول : بيجي في الجيوب الأنفية والمخ
وده عدوى بتصيب الجيوب الأنفية وممكن تنتشر وتوصل للمخ وده الغالب في مرضى السكر غير المنضبط وفي المرضى اللي عملوا زرع كلى
- التاني : بيجي في الرئة
وده الغالب بتاعه في مرضى السرطان والمرضى اللي عملوا زرع أعضاء أو زرع خلايا جذعية
- التالت : بيجي في الجلد
وده بسبب دخول الفطريات الجسم عن طريق قطع في الجلد زي بعد الجراحة أو الحرق ، أو أي إصابة جلدية ده الغالب بيكون في الناس الأصحاء اللي معندهمش ضعف في المناعة
- الرابع : بيجي في المعدة والأمعاء
وده الغالب بيكون في الأطفال الصغار أكتر منه في الكبار وخصوصاً الأطفال المبتسرين واللي وزنهم بيكون قليل عند الولادة وعمرهم بيقل عن شهر واحد ، واللي عملوا جراحة أو أخدو مضادات حيوية أو أدوية قللت قدرة جسمهم على محاربة الجراثيم والأمراض
- وده نادر : بيجي في الكلى
- الخامس : بيجي في الدم
وده لما تنتشر العدوى خلال مجرى الدم وتؤثر على جزء أخر من الجسم في الغالب على المخ وممكن تؤثر أيضًا على أعضاء تانية زي الطحال .
- وفي حالات نادرة بتوصل للقلب والكلى والعظم
مؤمن قاله وبتتشخص إزاي أشكال الفطر الأسود ياعم حكيم ؟
عم حكيم قاله تشخيص الفطر بيعتمد على
- الكشف والتاريخ المرضي ووجود مؤشرات للعدوى ومش بسهولة نقول دي عدوى الفطر الأسود،
- ورغم إن الأشعة المقطعية والرنين المغناطيسي ممكن تساعد في تحديد مدى العدوى أو تدمير الأنسجة فإن نتايجها مش محددة للفطر الأسود
- ومفيش تحاليل دم معينة مفيدة في تحديدة بس في حالة أخد عينة أو خزعة من نسيج حصلنا عليها من إستئصال جراحي أو منظار من الأنسجة المصابة بيكون الأفضل في التشخيص النهائي وتحديد نوع الفطر بدقة
- ولكن في بعض الأوقات بيكون صعب تحديد نوع الفطر اللي أصاب المريض لكن الطبيب وممارسته العملية بتكون هي الأساس في كده
مؤمن قال له وأشكال الفطر الأسود دي لها علاج يا عم حكيم ؟
عم حكيم قال له الحمد لله يا مؤمن له علاج
- بس لازم العلاج يكون سريع وقوي لأن فرص الشفاء منه بتعتمد بشكل كبير على التشخيص والعلاج المبكر لأن العدوى ممكن تنتشر في الجسم كله
- ولأن المريض غالباً بيكون عانى من تلف كبير في أنسجته فبالتالي حيحتاج إلى جراحة لإزالة الأنسجة المصابة أو الميتة والجلد التالف والأنسجة تحت الجلد المصابة
- وكمان علاجات دوائية عن طريق الوريد أو الفم زي الأدوية المضادة للفطريات وممكن بعض المرضى ياخدوا علاج مساعد بالأكسجين عالي الضغط
- وبالنسبة لمرضى السكر حيحتاجوا السيطرة على حالتهم وكمان المرضى اللي بياخدوا أدوية المناعة لازم نوقفها لهم عشان ما يبقاش الفطريات في الجسم
- وده لأن مضاعفات المرض خطيرة وممكن تؤدي إلى العمى والإلتهاب السحائي وخراج المخ وإلتهاب نخاع العظم والنزيف الرئوي ونزيف الجهاز الهضمي وتضرر الأعضاء وأخيراً عدوى بكتيرية ثانوية وتسمم الدم والموت
>>> اقرأ أيضًا: أمان باراسيتامول يخليه رقم 1
عم حكيم قال لمؤمن فهمت أشكال الفطر الأسود دلوقتي ؟
وأخيرا عم حكيم قال ل مؤمن وضحت الصورة أكتر دلوقتي وعرفت أن الفطر الأسود ده مفيش أي خطورة حقيقية منه إلا على مرضي معروفين أو على ناس صحيحة بس مش مهتمين بالوقاية والنظافة والرعاية الصحية السليمة
عشان كده عايزك ضروري لما تتعب ما تقولش أنا عيان وبس ولازم تروح ل الدكتور وتطمن على صحتك
راح مؤمن قال ل عم حكيم أيوه الحمد لله وضحت الصورة وفهمت كل اللي قولتهولي وحعمل بكلامك ونصايحك دي إن شاء الله وربنا يكفينا شر المرض جميعا آمين
