أخبار طبيةمقالات الرأي الطبي
أخر الأخبار

تجربتي مع الدكتور أحمد أبو النصر – قصة حقيقية

رحلتي مع مرض التهاب الفقرات التصلبي، وتجربتي مع الدكتور أحمد أبو النصر والعلاج بسم النحل


أنشر هنا نص رسالة صديقي المهندس (إسلام أبو بكر) في تجربته مع العلاج في عيادة الدكتور احمد ابو النصر كما وصلتني منه على بريدي الإلكتروني في بداية معرفتي به منذ أكثر من عام (في أوائل سنة 2020):

ومن باب الدقة والأمانة العلمية فقد قمت بترجمة بعض المصطلحات للغة العربية لتسهيل القراءة على غير المتخصصين في حين أن مهندس إسلام كان قد كتبها في رسالته باللغة الانجليزية وأيضاً قمت بإضافة بعض الصور للمقال.


:رسالة إلى الدكتور محمد منصور – بقلم المهندس إسلام أبوبكر

السلام عليكم

تقريبًا أنا متابع قناتك “قناة الدكتور” منذ بدايتها، وأتذكر أول ما شدني فيها هو تبنيك لمسألة (طب ولا عك)، فيه محتوى طبي مبسط للعامة كثير على اليوتيوب لكن المحتوى اللي قدمته كان مختلفًا تمامًا لأنه أول محتوى في مسألة تبسيط (المسائل الطبية) يقوله طبيب حقيقي وليس النماذج المنتشرة والمتصدرة للنوع هذا من المحتوى على اليوتيوب.

لذلك دعني أحكي لك حكايتي الصغيرة، وأقول لك رأيي المتواضع الذي قدرت أن أكونه بعد رحلتي ومعاناتي مع مرضي المزمن

(Ankylosing Spondylitis)

وليه أنا شايف إن فيه ثغرة في المنظومة الطبية معرفش تتحل إزاي! لكني قادر أشوف بوضوح إنها ثغرة، وبيتسلل منها النصابون والدجالون والهبيدة وكمان قصتي مع نصاب كبير ابتدى يكون له نشاط كبير في موضوع كورونا الفترة دي.

أنا حاليًا ٣٥ سنة، وفي ٢٠٠٨ حسيت فجأة بألم في المفصل العجزي بشكل غريب، والألم ساعتها منعني عن إني أمشي روحت فورًا بعد يومين لطبيب عظام، واللي طلب أشعة أكس على منطقة القطنية، واللي مظهرش فيها حاجة، وصرفلي مضادات التهاب، واللي أتحسنت عليها فعلًا، إلا إن الألم رجع تاني بعديها بأسبوع تقريبًا قعدت سنتين بروح لدكاترة المخ والأعصاب، ومكنش فيه حد بيقولي تشخيص لكن كان بيتقالي إنه التهاب في الفقرات بعد ما عملت رنين مغناطيسي على فقرات القطنية وبرضه خدت مضاد التهاب وفقط، بعدين ولحد ٢٠١٣ كان الهجوم بيعد تقريبًا، أسبوعين بشكل متواصل إلى أن يخفت، ولكن الألم بيفضل موجود لكنه مش بيعيق ممارسة نشاطي اليومي، لكن في آخر السنة دي (٢٠١٣) بدأ الألم يكون أقسى ومايروحش وكنت برضه بروح لدكاترة مخ وأعصاب وطبعًا أدوني أدوية مثبطات سيروتينين ومضادات التهاب، في الفترة دي كنت وصلت لمرحلة الإحباط والغضب، المفروض أعمل إيه عشان أعرف حتى أنا عندي إيه!

ولأني دودة قراءة لكني مهتم بمجالات علمية بعيدة عن الطب نسبيًا من باب حب المعرفة أبتديت أقرأ في كتب الطب، وفي مرة أشتريت كتاب اسمه (امتيازولوجي)، والكتاب ده هو اللي عرفت منه إني عندي مرض التهاب الفقرات التصلبي.

لإنه كان كتاب بسيط جدًا فيه الأعراض وطرق التشخيص والعلاج، وفي باب أمراض الروماتيزم قريت أعراض بتوصف الأعراض بتاعتي بدقة، وعرفت ساعتها إني كنت بروح عند التخصص الخاطئ، وفورًا توجهت لزيارة دكتورة أمراض روماتيزم ومناعة، ومع الكشف كانت الطبيبة من النوع اللي بيسمع وبيتكلم مع المريض وعرفت مني اـتاريخ المرضي وكمان قولتلها إني شاكك في مرض التهاب الفقرات التصلبي وبالكشف السريري كانت حركة المفاصل بتاعتي ممتازة وطبعًا عشان نتأكد من إن التشخيص صحيح فالدكتورة فعلًا طلبت رنين مغناطيسي على المفصل الحرقفي وهو بالفعل الي وضح وجود التورم والرشح على المفصلين.

طبعا شرحتلي خطة العلاج وكان رأيها إني أباشر بالعلاج البايولوجي، وقد كان.

وفضلت من ٢٠١٥ لحد يومنا هذا على حقن الإنبريل اللي يعتبر سحر ورجعني بني آدم طبيعي من تاني، وطبعًا عشان هو غالي والمفروض البروتوكول بتاعه إني أقلل الجرعات بعد كده عشان ممكن أوصل لجرعة كل ١٥ يوم أو شهر على حسب استجابتي وبقاء المادة في الدم، كل ده والأمور طبيعية لكن هنا تتدخل أمي في الموضوع! ????

حقن إنبريل التي تحتوي على مادة إيتانيرسيبت - رحلتي مع مرض التهاب الفقرات التصلبي
حقن إنبريل التي تحتوي على مادة إيتانيرسيبت – العلاج البيولوجي الأحدث لعلاج التهاب الفقرات التصلبي

أمي طبعًا سيدة طيبة وبتتألم لتألمي لكنها مصممة إن الكتب اللي بقرأها هي اللي ودتني في داهية، وده لأني مش موافقها على إني مش ملبوس ولا معمولي عمل، ولا إن فيه علاج أعشاب ولا طب نبوي ممكن يساعدني، وهي من طبعها العصبية والهيستريا وده اللي خلاني أرضخ لرغبتها في زيارة أحد النصابين بسبب إني خفت عليها من الانهيارات الهيستيرية المتكررة.

وفي مرة أصرت إني أكلم دكتورة راحت اتعالجت عند الراجل ده من خشونة المفاصل، وهنا كانت الكارثة لما سمعت بنفسي الدكتورة بتقولي إنه عالج سيدة من العقم وعرف يخلي المبيض يطلع بويضات، فبقولها على حد علمي المبيض الواحد فيه تقريبا ٤٠٠ بويضة، وبعد كده بيضمر مع التقدم في السن ودخول سن اليأس، لكنها أصرت على إنه قدر يعمل المعجزة دي! وكمان خلاها قادرة تصلي من غير ما تقعد على كرسي، ولذلك أنا كان منظري قدام أمي إني جاهل وملحد، ومش مؤمن بالمعجزات!????

طبعًا هو الصيدلي النصاب أحمد أبو النصر اللي حضرتك جبتله فيديو في حلقة العلاج بسم النحل، وخليني أقولك حصلي إيه في الوكر بتاعه.

روحت أنا وأمي، والعيادة كانت مليانة صنفين من المرضى (ناس بسطاء وسلفيين).

صور مركز الدكتور أحمد أبو النصر من خرائط جوجل
صور مركز الدكتور أحمد أبو النصر من خرائط جوجل

أثناء الانتظار ..اتكلمت مع أحد المرضى كحب استطلاع مني، وكان راجل بسيط على وشه علامات الذعر والألم، وعرفت منه إنه عنده الغضروف، وإن الدكتور قاله إنه لازم يعمل عملية، لكن قريبة نصحه إن العملية فيها خطر على حياته، وإنه يعرف واحد بيعالج الغضروف من غير تدخل جراحي، وعشان كده جه هنا، أنا استأذنته أشوف الأشعة، وبمعرفتي البسيطة من اطلاعي على قراءة الأشعة كنت قادر أشوف بوضوح إن الغضروف الداخلي ضاغط جدًا على العصب، ووجه الألم اللي قدامي ده مش بس باين على ملامح الراجل.. لا.. ده باين أوي في الأشعة.

نصحته يحفظ صحته وفلوسه ويروح للدكتور بتاعه، لكن للأسف نصيحتي زودت حيرته ويمكن ألمه!

المهم.. دخلنا أول حاجه لدكتور باطنة مكتوب على باب عيادته إن الفيزيتا اللي بتدفع لا تسترد، رغم إن الناس رايحه لأحمد أبو النصر، لكن عشان يدخلوله لازم يدخلوا يدفعوا ١٥٠ جنيه كشف لدكتور الباطنة الأول كده استفتاح للنصب ???? وغالبًا ده الدكتور اللي العيادة مفتوحة على رخصته ولازم ينال من الحب جانب!


طبعًا دخلنا وبحكيله فراح قالي “وإنت إيش عرفك إنك عندك التهاب الفقرات التصلبي؟

قولتله أنا روحت لثلاثة دكاترة روماتيزم، وشافوا الأشعات بتاعتي، وكمان أنا ماشي على حقن الانبريل اللي جايبة نتايج هايله معايا.. راح قالي: لا طبعًا .. “هو أنت عملت تحليل معامل روماتويد”؟


أنا هنا تنحت! إزاي انت طبيب، وتشوف إن تحليل معامل الروماتويد ممكن تعتمد عليه في تشخيص التهاب الفقرات التصلبي؟

Ankylosing Spondylitis (AS)

خرجنا من عنده ومعرفش كنا دخلنا ليه أصلًا إلا فقط للعرض على جناب الكوماندا الكبير، وبالفعل دخلناله، وكان بيتكلم معايا من غير مايبصلي، وكان بيوجه حديثه لأمي، وكل اللي كان بيقوله إني مش فاهم حاجه، وفي نص الكلام بيقولي إنه ممكن اللي عندي ده يكون بسبب نوع من البكتريا مش فاكر قال إيه حاجه زي شوبونجل ????


طبعًا أنا فاهم هو ليه بيهاجمني، وبيتكلم مع أمي مش أنا، عشان هي الزبون (المستوي) اللي يقدر يهندله إنما أنا بالنسباله مش الزبون المناسب خالص!

صور مركز الدكتور أحمد أبو النصر من خرائط جوجل
صور مركز الدكتور أحمد أبو النصر تظهر عدم نظافة العيادات – المصدر: خرائط جوجل

خرجنا من عنده ولقيت واحد من صبيانه (ماينفعش أقول عليه إلا إنه صبي شغال في الوكر ده بسبب طريقته وكلامه وهيئته) بيقولي يالا عشان هتاخد حقنة سم نحل! ودخلنا أوضة فيها سرنجات مرميه ع الأرض وإزازة سم النحل دي مفتوحة.

أنا طبعًا رفضت والمنظر خوفني.

أصل خلاص كده دخلنا في الجد، وطبعًا أمي بدأت تتعصب وصوتها يعلى، وكنا شبه بنتخانق في محاولة يائسة مني إني أقنعها إن ده خطر جدًا وأنا معرفش إذا أُستخدم الحقنة دي قبلي مع حد تاني! ولا إيه اللي في الحقنة أصلًا! وهل هو حاجة نضيفة ولا ملوثة؟ وهل هو طبيب عشان يعرف يتعامل معايا إذا طلع عندي حساسية، ورد فعل مناعي صادم!

طبعًا أنا بتكلم في وادي تاني، وفجأه أحس بنخز في إيدي، أتاري الحيوان استغل إني بتكلم مع أمي وراح مديني الحقنة في إيدي!

أنا ذهلت ومكنتش مصدق اللي حصل وأصبت بشلل في التفكير ورد الفعل، ومش عارف إزاي ماعملتش مصيبة ساعتها، لكن في لحظات قدرت استجمع نفسي وأعرف إن محاولة التحذلق هنا ومع الناس اللي هنا معناها مجهود على الفاضي.

نزلنا أنا وأمي عشان نصرف الخرافات اللي كاتبها كانت حاجات كتير منها ماهو عجيب لدرجة خلتني أروح البيت أعمل بحث عن الاسامي دي، وعشان أفاجأ إن منها حاجة اسمها

Cordyceps

وده فطر بينمو على جثث النمل. المهم إن له خصائص في تنشيط الجهاز المناعي، وطبعًا فشلت إني أقنع أمي إن لو خدت الحاجات دي صحتي هتدهور، وإن المستخلصات دي هتخلي جهازي المناعي عنيف، فشلت أقولها إن ده ملهوش علاقة بالطب، إزاي في حد عنده اضطراب مناعة ذاتية أديله حاجه تنشط المناعة! النصاب ده فاهم إن اضطراب المناعة معناه ضعف مناعة!

وقد كان!

طبعًا حالتي أتدهورت جدًا، والنشاط رجع أعنف من الأول، وماما كان لازم تشوف ده عشان تقتنع وراحت خدت الأدوية وراحت رجعتهاله وكانت هتعمله فضيحة لكنه إتصرف كأي نصاب آخر بيحترم نفسه، وبيخاف على سمعته؛ وأداها الفلوس، طبعًا أنا أحتفظت بعلبة دواء الكورديسيبس وأرفقتلك صورة.

مستخلص فطر كورديسيبس - تجربتي مع الدكتور أحمد أبو النصر للعلاج بالنباتات الطبية وسم النحل
مستخلص فطر كورديسيبس – الدكتور أحمد أبو النصر للعلاج بالنباتات الطبية وسم النحل

أنا طوال الفترة من ٢٠١٦ إلى الآن قدرت إني أوسع الفترة بين كل حقنة والتانية لأن فعلًا مصاريفها غالية جداً. والتجارب دي كانت بين صيام الماء ورغم خطورته إلا إنه كان بيساعد، وبيخلي النشاط الالتهابي في أدنى مستوياته، وكمان (فيتامين د) ساعدني بشكل كبير جدًا جدًا، وأكتشفت إن مرضى الروماتويد بيكون عندهم نقص شديد فيه، طبعًا دي كلها اجتهادات غير أكاديمية، ولا عليها إثباتات قوية، ولكنها ساعدتني وبعملها بحرص.

الثغرة اللي كنت أقصدها في بداية الرسالة هي إنه فيه بعض الدكاترة مش بيتكلموا مع مرضاهم، يعني أي مريض مرض مزمن لازم الدكتور يتكلم مع المريض بشكل واضح ويحذره من إن مفيش علاج قاطع وأن أي حد هيقوله غير كده يبقى بيضحك عليه، يعني دور الطبيب يتعدى مسألة كتابة العلاج، وتوعية المريض والكلام معاه ممكن جدًا يقفل على النصابين دول الثغرة دي، وليه قولت إني مش عارف لها حل، لأنها برضه مهياش مضمونة لكن على الأقل لازم تتقال، أنا تقريبًا روحت ل ١٥ طبيب طول الرحلة دي، وفي الأول مكانش فيه تشخيص وبعد التشخيص مكانش فيه غير طبيبة بس من كل الأطباء بتتكلم معايا، وتشرحلي حالتي.

أنا بعتلك عشان صوتك مسموع، ومحتواك محترم وبيحترم العلم والمنهج العلمي، وده شجعني إني أبعتلك قصتي مع النصاب ده، وكمان إرهاصاتي عن بعض المشاكل والثغرات في المنظومة الطبية، وأتمنى أعرف رأيك في إيه هي اقتراحاتك للدكتور في كلامه مع المريض، وكمان إزاي نقدر نخلي المريض عنده الحد الأدنى من المعرفة اللي ساعات كتير بتكون أهم من الدواء نفسه.

تحياتي الحارة لمجهودك العظيم وضميرك الحي!


جزيل الشكر لصديقي المهندس (إسلام أبو بكر) الذي أتشرف بصداقته، والذي سمح لي الآن بنشر هذه الرسالة التي أرسلها لي العام الماضي.


و قد حكيت هذه القصة باختصار عندما وضحت حقيقة علاجات الدكتور أحمد أبو النصر في هذا الفيديو “الدكتور أحمد أبو النصر – للنصب عنوان” لمن يريد مشاهدته لمزيد من التفاصيل

حقيقة الدكتور أحمد أبو النصر والعلاج بالأعشاب والنباتات الطبية
حقيقة الدكتور أحمد أبو النصر والعلاج بالأعشاب والنباتات الطبية

د.محمد منصور

الدكتور محمد منصور طبيب الأمراض الباطنة وأمراض الكلى بمستشفيات جامعة ليستر - بريطانيا مؤسس قناة وموقع "الدكتور"

تعليق واحد

اترك تعليقاً

زر الذهاب إلى الأعلى