ما هي أفضل ساعة ذكية طبية؟ ساعة سامسونج جالاكسي ووتش 4 هل هي أفضل ساعة ذكية بخصائص صحية؟ جالاكسي ووتش 3 أم جالاكسي ووتش 4؟
فيديوهات كتير موجودة عن جالاكسي ووتش 3 ومؤخراً جالاكسي ووتش 4.. مميزاتها وامكانياتها ومواصفاتها..
لكن اللي يهمني ويهم ناس كتير ان الساعات دي بجانب الشياكة والذكاء اللي فيها كسمارت ووتش.. بتتقدملنا كأجهزة طبية وفيها خدمات وتطبيقات صحية رهيبة..
المفروض ان الساعات دي… تنفع بديل لجهاز الضغط والأوكسيميتر وجهاز رسم القلب وجهاز دراسات النوم (سليب ستاديز) و جهاز إنبدي (جهاز تحليل مكونات الجسم)
وبماا اني طبيب .. يعني ده شغلي.. ولابس الساعة دي بقالي حوالي سنة دلوقت.. وحضراتكم طلبتوها مني كتير.. فأنا هتكلم أساساً من ناحية الفوائد الطبية والصحية واللي مالقيتش حد غطاها على حسب ما شفت على يوتيوب العربي.
وبالمرة هقول لك باختصار شديد أهم مميزات الساعات دي و رأيي فيهم بعد التجربة اليومية لفترة طويلة
يعني تقدر تقول كده ان الفيديو ده هيكون عرض الكومبو ..
ملخص لرأيي في جالاكسي ووتش 3 بعد استعمال داخل على سنة.. استعمال طبيب ..
مقارنة بينها وبين جالاكسي ووتش 4 الجديدة ..
ما هي أفضل ساعة ذكية طبية؟.. جالاكسي ووتش 3 أم جالاكسي ووتش 4؟
تقييم تطبيقاتهم الصحية والطبية وقد إيه هم فعلاً مفيدين أو لأ وهل يمكن الاعتماد عليهم ولا لأ
مين اللي ممكن يستفيد منهم وازاي..
هل أنصح بشرائهم ولا لأ حسب انت مين وعايز منها ايه
كل ده في فيديو واحد 10 دقايق من سلسلة طب وتك.
ان شاء الله الفيديو ده هيوفر عليك مشاهدة عشر فيديوهات وقراءة عشر مقالات لو انت مهتم بموضوع الساعات الذكية والتطبيقات الصحية اللي ممكن تستفيدها منها
ولو عايز تروح لنقطة معينة.. هتلاقي التوقيتات في وصف الفيديو.
طبعاً اللي متابع في حضراتكم عارف ان جالاكسي ووتش 3 دلوقت نزل سعرها لأن جالاكسي ووتش ٤ نزلت من شهرين.. ودي فرصة نتكلم عنها دلوقت بعد ما جربتها بما فيه الكفاية وبعد ما سعرها أصبح في متناول ناس أكتر
يمكنك مشاهدة فيديو “أرخص ساعات ذكية طبية بسعر أقل من خمسين دولار” من هنا
بس قبل ما أحكيلكم عن الساعات دي .. خلوني أحكيلكم الأول.. أنا وسامسونج.. وقصة حبنا.. (اللي ممكن تنتهي بعد الفيديو ده!)
بقالي 10 سنين بالتمام والكمال مع سامسونج .. من سنة 2011 و أيام السامسونج S2 لو حد لسه فاكره
من يومها كل ما افكر اغير ماعرفش.. مرتبط بيهم ارتباط عجيب.. اروح للي أرخص زي واوي ولا شركة صينية بتدعي انها زيهم ألاقي ان فيه حاجات كتير ناقصة ومش قايلين انها ناقصة.. سنسور.. فرق جودة أومتانة .
أفكر في التفاحة اللي أصدقائي الكول ماسكينها.. أقعد أيام أذاكر.. وأوصل للقناعة ان لأ.. أنا عايز أندرويد.. عايز نظام مفتوح.. مش مرتاح مع الأي أو إس..
وأول مانزلت ساعة سمارت محترمة في 2014 ال جير إس .. اشتريتها ونمت قصة حب بيني وبينها لحد ماتسرقت مني في اجازة في سوق باكوس في اسكندرية .. الله يرحمها كان فيها عيب قاتل ان جسم الساعة نفسه بيتفك من الباند بسهولة.. ففي الزحمة واحد بس يحط ايده ويفكها مش هتاخد بالك
يعني هو كان فاكر نفسه هيعمل شغلانة صعبة ويفك الساعة عشان يسرقها.. مسكها راحت طالعة في ايده وفضل معايا انا الباند بس
بالذات لو خبط فيك وانت مشغول
المهم مرت السنين وانا بنقل من سامسونج لسامسونج..
ومن حوالي سنة..بالظبط من 9 شهور.. غيرت الموبايل (سامسونج برضه زي ماقلتلكم في الأول.. وجبت معاه ساعة جالاكسي ووتش 3) بالمرة بقى.. ماهو مادام خراب ديار يبقى استمتع بالموضوع!
كانت المقارنة بالنسبة لي هل أجيب أبل ووتش سيريس كذا (وطبعا اجيب آي فون) ولا واوي جي تي 2 ولا فيت بيت فيرسا؟
وكالعادة.. رسيت على سامسونج
وخلال الشهور اللي فاتوا دول استعملتها بما فيه الكفاية لإني أقدر أجاوب كل سؤال من الأربع أسئلة دول بالتفصيل وبطريقة موضوعية:
1- من ناحية طبية.. الساعة دي واحدة من أفضل الأجهزة الطبية السمارت اللي بتتلبس على الرسغ الموجودة في العالم حالياً .. فهي بتعمل إيه؟ وياترى بتعمله كويس ولا لأ؟ وهل ده مفيد لحضرتك ولا لأ؟ (ما هي إمكانياتها الحقيقية كجهاز طبي؟)
2- الساعة دي بتعمل إيه؟ فوايدها واستعمالاتها المفيدة الغير طبية (ماهي مميزات هذه الساعة؟)
4- الفروقات بين ووتش 3 و ووتش 4 من ناحية التطبيقات الصحية والطبية (Galaxy Watch 3 Vs Galaxy Watch 4)
4- رأيي إجمالاً في الساعة كمستخدم للسمارت ووتشز وكطبيب.. وهل أنا شايف انها تستاهل تمنها ولا لأ .. وهنا غالباً هتتفاجئ بصراحة (هل أنصح بشرائها أم لا؟)
1- الإمكانيات والتطبيقات الصحية والطبية لساعة سامسونج الذكية جالاكسي ووتش ثري Galaxy Watch 3:
- قياس نسبة الأكسجين: (خاصية مهمة جداً خصوصاً في فترة كوفيد – مشكلته إنه بياخد عدة ثواني عشان يديك قراءة – لكنه دقيق بشكل كبير)
- قياس معدل ضربات القلب والفارق بين قياس النبض وعد معدل ضربات القلب (الطبيب بيشوف حاجات تانية في النبض .. لكن فعلياً من أهم الحاجات هو عدد الضربات)
- قياس ضغط الدم (أسهل بكتير من استعمال أجهزة الضغط المتخصصة.. موجود معاك طول الوقت.. يحتاج لمعايرة عند أول استخدام)
- رسم القلب ( يرسم القلب من جهة واحدة (ليد واحد) – لا يشخص جلطات القلب ولا قصور الشريان التاجي لكن يمكنه تشخيص اضطرابات الإيقاع (الريذم) وأمراض مثل الإرتعاش الأذيني .. الدقة ممكن يكون فيها كلام لكنها مبهرة)
- الستريس ليفيل
- الوومان هيلث
- متابع الأنشطة (الجري والمشي والقفز والسباحة وركوب الدراجات وغيرهم)
2- المميزات العامة للساعة الذكية جالاكسي واتش 3 والعيب القاتل للساعة:
الفيديوهات ما أكترها.. لكن خليني أقولك بعد استعمال قرب من سنة.. إيه هي أكتر حاجات فعلاً فرقت معايا
والميزة في الفيديو ده ان انا شاريها بفلوسي.. ماحدش بعتهالي.. مليش مصالح مع حد.. ريفيو أمين 100% لأن كتير من الريفيوهات مع انها مفيدة جداً لكنها بتكون منحازة
المميزات العملية المهمة:
1- الشياكة Accessory
2- مقاومة الخدش والكسر والمياه
3- التنبيهات هاندس فري (بالذات لو سايق أو إيدي مشغولة)
4- الإي سيم ماستعملتهاش مع اني دفعت فيها كتير (فرق الساعة اللي مفيهاش عن اللي فيها
5- LTE أو خاصية استعمال الساعة كجهاز موبايل باتصالات شبكية إلكترونية (الشريحة الإلكترونية)
6- الدفع الكونتاكتليس .. ورغم اني كل يوم بدفع كونتاكتليس كذا مرةزز فاستعمال كارت الفيزا او الموبايل بيكونوا اسهل .. بصراحة هي الساعة أسهل لكن البطارية لا يعتمد عليها انها تحرجك لأنها خلصت وانت رايح تدفع
وده ياخدنا للعيب القاتل: البطارية
العيب القاتل بالنسبة لي هو وقت استهلاك البطارية!
الناس المهتمة هتفهم ان بطارية340 أمبير مع ساعة استهلاكها زي دي قليل..
لكن اللي مش مهتم بالتفاصيل الفنية.. يكفيك تعرف اني لازم اشحنها كل يوم وإلا تفصل في نص اليوم اللي بعده
وعشان كده مضطر اغيرها لساعة تانية لأن ده مش عملي بصراحة.. خصوصاً ان الشاحن مش شاحن عادي ..
فلازم تاخده معاك في كل حتة تروحها.. ولو نسيته يبقى مش معاك ساعة
ولو فصلت.. مش معاك ساعة
ولو لغيت الفيتشرز أو استعملت نظام توفير البطارية .. مابقتش ساعة ذكية
3- الفروقات بين جالاكسي ووتش 3 و جالاكسي ووتش 4:
ما هي أفضل ساعة ذكية طبية؟ جالاكسي ووتش 3 أم جالاكسي ووتش 4؟
مش هقولك البروسيسور بقى أعلى شوية والرامات زادت من 1 جيجا لواحد ونص لأن دي مش قناة تك ريفيو .. زائد ان بصراحة دي مش فروق كبيرة أصلاً تحس بيها في استعمال الساعة
ممكن أقول ان الفروقات الأساسية هي:
1- الشكل أشيك من ناحية التصميم وشكل الزراير الجانبية
2- البطارية زادت 200 ميللي أمبير من 340 لحوالي 360 (طبعاً بتكلم عن الووتش 4 كلاسيك.. الكبيرة) يعني ساعتين تلاتة زيادة في الاستعمال.
3- نظام التشغيل اتغير من تايزن بتاع سامسونج لوير أو إس بتاع جوجل مع اضافات من سامسونج وده هيفتح أبواب كتير كانت مقفولة زي جوجل اسيستانت وجوجل باي وحاجات تانية كتير متوقعة
4- الفارق بين التطبيقات الصحية والطبية بين ساعة جالاكسي واتش ثري وجالاكسي واتش فور :
أولاً: رغم انك هتلاحظ ان هي هي نفس التطبيقات لكن هتلاحظ ان كل التطبيقات أدق وأسرع شوية لما تقارنهم..
ثانياً تم إضافة حاجتين فيه ناس شايفاهم معجزات..وفيه ناس بتشكك في دقتهم..
Sleep studies
أهمية الكلام ده للناس اللي وزنها زايد شوية أو اللي بتشخر بالليل .. وأحياناً تشخيص متلازمة زي توقف التنفس أثناء النوم والتعامل معاها بيغير حياة المريض
طبعاً محتاجة تقييم بعد فترة ونشوف مقارنة نتايجها بسليب ستاديز احترافية مع الوقت.. لكنها طفرة حقيقية (التكلفة والسهولة والراحة.
Body Composition Analysis
والساعة بتستخدم البيو لإمبيدنس أناليسيز عشان تقولك مكونات جسمك (الدقة مبهرة بصراحة بالنسبة لساعة في ايدك.. واكتر الناس اللي اشتكت من الاختلافات غالباً بتكون بسبب الحاجات اللي بتأثر على البايوإمبيدنس عموماً زي الأكل والشرب والكافين والرياضة الجامدة)
وماتنساش ان البديل هو انك تروح مكان متخصص.. جيم أو عيادة تقيس فيها الكلام ده .. غالباً بفلوس كل مرة
عموماً .. البيو إمبيدنس أناليسز ده أحد المواضيع اللي انا حابب اشرحها في فيديو.. ازاي بيشتغل وايه استعمالاته وازاي تستفيد منه؟ وجهاز زي إنبدي (صورة إنبدي) لو رايح تقيس عليه جسمك المفروض تعمل ايه الاول وتخلي بالك من ايه عشان تطلع القياسات أدق ما يمكن
4- هل ساعة سامسونج الجديدة تستحق الشراء؟ ومن يمكن أن يستفيد منها؟
دي حاجة تختلف من واحد لواحد
الشكل شيك.. أنا بتكلم على ووتش 3 أو ووتش 4 كلاسيك.. و الشكل مودرن للووتش 4 ..
لو حضرتك من الناس اللي بتحب تلبس ساعات براندات فهتكون عارف ان سعر الساعة دي بالنسبة لبراندات الساعات العالية فهو أرخص من كتير منهم..
لو حضرتك بتحب الحجم الكبير والشكل الكلاسيكي فممكن تجيب ووتش 4 كلاسيك أو تجيب ووتش 3 وممكن تلاقيها مستعملة بنصف التمن.. ولو عايز حاجة سبورتي وشبه الأبل ووتش فعندك الووتش 4
من ناحية اللإمكانيات الطبية.. فالساعة تمنها أرخص بكتير جداً من عدد الأجهزة اللي هي بتبدلهم..
ولأني خلال الشهور الأخيرة زي ما حضراتكم عارفين كنت بقول دايماً نشتري جهاز ضغط ونشتري أوكسيميتر وترمومتر والحاجات دي تكون في البيت.. فممكن ساعة زي دي في البيت تطلع علاماتك الحيوية في تقرير وتبعتها لطبيبك عند اللزوم
وبدل ماتنزل تدور على حد يعمل لك الحاجات دي.. الساعة تعملهالك.. طبعاً تنبيه مهم ان دقة الساعة والاعتماد عليها في التشخيص هو امر لا يمكن الإعتماد عليه في حالة المرض.
لو حضرتك عايز ساعة تستعملها كموبايل فدي من أقوى الموبايلات اللي في شكل ساعة اللي شفتها في حياتي.
انت معاك موبايل (لو جبتله سماعة بلوتوث) وشغلت شريحة إيسيم يبقى معاك موبايل محترم.
لو حضرتك مش مهتم بالامكانيات الصحية دي ولا بالشكل والشريحة الإي سيم.. فأظن ان فيه ساعات سمارت كتير أرخص وشكلها جميل والأهم بطارياتها بتقعد فترة أطول
وزي ماقلت .. العيب القاتل اللي هيخليني لأول مرة من 10 سنين ممكن أسيب سامسونج واروح لأبل أو واوي أو غيرهم هو البطارية اللي مش بتقعد أكتر من يوم ونصف.
الفيديو الجاي ان شاء الله من طب وتك هيكون عن أرخص ساعة طبية محترمة استعملتها
لو تعرف حد مهتم أو ممكن يستفيد بالموضوع ده ياريت تبعتله رابط الفيديو من قناة الدكتور
ويمكنك مشاهدة باقي فيديوهات قناة الدكتور من هنا
وياريت تشترك معانا في النشرة البريدية عشان نتقابل في حالة حدوث أي مشاكل بالقناة
و يمكنك مشاهدة فيديو “أرخص ساعات ذكية طبية بسعر أقل من خمسين دولار” من هنا
