طب بالعامية

استعمال الأدوية بدون تعليمات الطبيب!

Advertisements

تعرفوا لو استخدمتوا دواء بدون تعليمات الطبيب/الصيدلي ايه ممكن يحصل؟! اسمعوا القصة دي

سنة 1957 شركة ألمانية لطيفة اسمها: ‏( Chemie Grünenthal GmbH )نزلت دواء لطيف اسمه ثاليدومايد.. الشركة ادعت إنه آمن تماما و مناسِب لكلِ حد ، و قالت إنهم أثناء الاختبارات على الفئران ما قدروش يلاقوا جرعة من الدواء دا تموت الفئران ، بيزودوا الجرعة كل شوية و برضو الفار ما بيموتش من كثر ما الدواء آمن النّاس كلها بدأت تاخذ الدواء دا اللي استخدامه الأساسي كان كمهدئ ، خصوصا و إن المهدئات لها آثار جانبية و تفاعلات دوائية و أعراض انسحاب لو تم استخدامها بشكل خاطِئ ، فلازم تتاخذ تحت إشراف طبيب متخصص ؛ المهم الناس فرحت بالمهدئ الآمن الجميل دا لغاية ما حصلت الكارثة ، سنة 1962 السيدات اللي أخذوا الثاليدومايد و هما حوامل وضعوا أطفال مشوهين ، المهدئ الآمن طلع بيشوه الأجنة ، رغم إن دي كانت كارثة بكل المقاييس و الدواء اتسحب و الشركة خسرت ملايين لإن هيئة الدواء و الغذاء أجبرتها تقدم تعويضات مادية للضحايا إلا إن العالم كله اتعلم من الكارثة دي.

عشان كده المراحل اللي الدواء بقى يمر بيها دلوقتي عشان ينزل السوق بقت أكثر تعقيدا ، و عرفنا إن بعض الأدوية ما تنفعش للسيدات الحوامل أو المرضعات ، و بقينا أكثر وعيا بآثار الدواء الجانبية و أكثر قدرة على تلافيها سواء كمختصين في الرعاية الصحية أو كمتلقين لها. لذلك حقول لكم على بعض الأمثلة لأدوية لها آثار جانبية و ازاي المفروض نتلافاها.

لو الطبيب كتب أدوية سلفا وماقلش للمريض يشرب مية كتير أثناء فترة العلاج لإن مركبات السلفا بتتركز في الكلي وممكن تسبب التهاب كلوي وحصوات.

لو كتبله مضاد حيوي من مجموعة سيبروفلوكساسين ونسي يحذره من الخروج والتعرض للشمس أثناء الظهيرة أو استخدام واقي شمس لإن أثناء فترة العلاج بالأدوية دي بيكون المريض عنده حساسية لضوء الشمس وممكن تسبب له حروق في الوجه والجلد وتؤذي العين.

لو كتبله مضاد حيوي اسمه زيثروكان أو زيسروسين أو أزيثرومايسين ونسي يقوله تاخدها بعد الأكل بساعتين لإنه لو أخذها بعد الأكل مباشرة حيفسد مفعولها.

لو كتب لابنك مضاد حيوي زي هاي بيوتك أو اوجمنتين شراب أو أي حاجه بنفس تركيبتهم ونسي يقولك احفظه في التلاجه مباشرة بعد الحل لإنك لو نسيته برا التلاجة حيبوظ على طول ولازم ترميه أول مالونه يتحول من الأبيض للأصفر الغامق.

لو كتبلك أقراص مضادة للالتهابات بيكتبها كتير أطباء الأسنان والعظام وتخصصات أخرى اسمها الفنترن أو أمبيزيم ونسي يقولك تاخدها قبل الأكل بساعة أو بعد الأكل بساعتين لإن أقل من كدا مش حتستفيد منها نهائيا لإنها إذا اتاخدت مع الأكل حتحلل البروتينات اللي في الأكل بدل من البروتينات المسببة للورم فلازم تكون المعدة خالية.

لو الدكتور أو الصيدلي أعطاك حاجة مسكنة للألم والصداع من مجموعة ديكلوفيناك زي كتافلام أو مجموعة كيتوبروفين زي باي الكوفان ونسي أنك بترضعي وخصوصا لو طفل حديث الولادة لإن الأدوية دي حتسبب لابنك ارتجاع و حرقان و مغص و انتفاخ و حيفضل يعيط كل ما ترضعيه و حتدوخي عشان تعرفي ايه السبب و الدواء بتاعك هو السبب.

لو كتبلك دواء مسكن بروفين ونسي يسألك هل بتاخد أي نوع أسبرين للسيولة أم لا لإن البروفين بيلغي تأثير الأسبرين فلو كنت مريض بالقلب أو الضغط ومحتاج تأثير الأسبرين ما تاخدش معاه بروفين في نفس الوقت.

لو تعرفوا حد بياخذ أدوية بدون مراجعة الطبيب‎/الصيدلي أو حد كبير في السن و بياخذ أدوية كثير في نفس الوقت أو عنده مشاكل في الكبد/الكلى أو سيدة حامل شاركوا معاهم البوست دا و انصحوهم يراجعوا أدويتهم باستمرار مع مختص.
و دمتم سالمين و أصحاء دوما.

Advertisements
زر الذهاب إلى الأعلى