طب بالعامية

الأكل والسعرات الحرارية

Advertisements

بما إننا الشهر ده بنتكلم عن الدايت وأنواعه

هل فعلاً فيه أكلات سالبة السعرات؟! هل فعلاً فيه أكلات لما تاكلها بتخس لأنها بتخلي الجسم يحرق سعرات أكتر من السعرات اللي في الأكلات دي؟؟

الموضوع منتشر على قنوات وبرامج كتير ، وكلهم بيقولوا نفس المعلومة: إنك لو أكلت خضار أو فاكهة تديك 100 سعر حراري ، فجسمك هيستهلك 250 سعر حراري عشان يهضمها !

وده للأسف مش صحيح!! (ماعرفش حتى جابوا الرقم اللي كلهم بيكرروه ورا بعض ده منين؟!)

مفيش حاجة علمية اسمها أكلات سالبة السعرات! “Negative-Calories food” ولا حتى “Zero-Calories food”!

صحيح انك لما بتاكل جسمك بيحرق سعرات عشان يهضم الأكل ، لكن ده لا يتعدى 3-4 سعرات في المضغ (يعني ولا حاجة!) ، وده لو بتمضغ بشكل متواصل لمدة ربع ساعة! وبعدها معدل الحرق بتاع جسمك بيزيد زيادة بسيطة جداً لمدة ساعة عشان بداية الهضم (شيء لا يذكر!)

نفس الكلام ينطبق على إن شرب المياه (اللي هي مفيهاش سعرات) بيحرق سعرات! (أيوة بيحصل ، لكن شيء لا يذكر!! وعمرك ماهتخس بسببه!)

هل معنى كده إن الحاجات دي (الخضروات والمياه) مش مفيدة؟؟

لأ ، مفيدة جداً و مليانة سوائل جسمك محتاجها خصوصاً لو عامل الدايت ، والخضروات مليانة فيتامينات وأملاح ومعادن أساسية مهمة جدا خصوصاً مع الدايت وطبعاً لأنها قليلة السعرات فهي مفيدة في إنها تحسسك بالشبع وتملا بطنك بدون ماتديك سعرات كتير.

خلاصة الكلام: الخضروات والفاكهة قليلة السعرات والمياه مهمين جداً ومفيدين جداً ، لكن ماتصدقش اللي يقول لك إن سعراتهم سالبة!

Advertisements

د.محمد منصور

دكتور محمد منصور طبيب الباطنة والكلى مستشفيات جامعة ليستر - بريطانيا مؤسس فناة و موقع الدكتور
زر الذهاب إلى الأعلى