طب بالعامية

حموضة المعدة

Advertisements

كثير مننا بيحس ساعات بحموضة و حرقة في المعدة بعد تناول نوع معين من الأكل زى الأكل المقلي مثلًا أو الحار.

حرقة المعدة مشكلة شائعة و لكن لحسن الحظ لو بتحصل بشكل عرضي مافيش منها قلق ، الألم بيكون خلف عظمة الصدر مباشرة ( فُم المعدة ) و بيكون بعد الأكل و غالبا بيزيد عند الاستلقاء أو الانحناء.

الموضوع دا بيحصل بسبب ضعف في العضلة الموجودة أسفل المريء ( العضلة العاصرة المريئية ) ، فبيحصل ارتخاء للعضلة و ما بتقفلش كويس عشان تمنع الطعام و العصارة المعدية من الارتداد من المعدة إلى المريء ، فيحصل الارتجاع و الشعور بالحرقة و الألم و أيضا الشعور بطعم حمضي في الفم ؛ لو كان الموضوع دا مش بيتكرر كثير ( أقل من مرتين في الأسبوع ) فدي حرقة معدية عرضية ، لكن لو أكثر من كدا فقد يكون عرض للارتجاع المريئي.

عندنا بعض الخطوات البسيطة اللي نقدر نعملها للتخفيف من الألم:- نحافظ على وزن صحي ، لإن الوزن الزائد قد يضغط على المعدة و يزود ارتجاع حمض المعدة و الحرقان. -بلاش نلبس ملابس ضيقة لنفس السبب السابق عشان ما نزودش الضغط على المعدة. -نبعد عن الأطعمة اللي بتزود الحموضة ، غالبًا هي الأطعمة المقلية أو الحارة ( لو حسيت إنك بتتعب أكثر بعد أكلة معينة تجنبها ). -ما ناكلش و ننام على طول ،( نستنى من ساعتين لثلاث ساعات ). -بلاش وجبات كبيرة و الأفضل وجبات صغيرة بعدد أكثر على مدار اليوم. -لو الحرقة بتزيد بالليل نحاول نرفع الرأس قليلاً عن مستوى باقي الجسم أثناء النوم.

و طبعاً مضادات الحموضة ( فوار فواكه و مالوكس ) و الـ H2 blockers ( راني و أنتودين ) و الـ PPI ( بانتولوك، بيبزول، اوميز ) كل دي خيارات علاجية فعالة.

شاركوا البوست مع صحابكم لتعم الفائدة و دمتم سالمين و أصحاء.

Advertisements
زر الذهاب إلى الأعلى