طب بالعامية

فيرس التهاب الكبد الوبائي سي

Advertisements

وانت بتسمع التلفزيون! أو بتقرأ الاخبار!! أو حتي كنت ماشي في الشارع كدا و لمحت يافطة !!! عن “حملة مصر بدون فيرس سي “

جربت تسأل نفسك هي الحملة دى لمين ؟! طب ما سألتش نفسك مرة هو امتي لازم احلل ؟ ولا جه في دماغك يوم كدا مين دول اللي بيتكلمو عنهم ؟

وهو انا وانت (بعد الشر يعني ) ممكن نكون اتعرضنا للفيرس سي واحنا مش عارفين ؟

النهاردة هنتكلم عن فيرس التهاب الكبد الوبائي سي ، موضوع مهم انك تعرف فيه نقط كدا تكفيك لثقافتك الشخصية وتساعد بيها اللى حوليك.

بص يا سيدى لو تعرف حد فيه أي حاجة من اللى جاي ده ابعته علي اقرب معمل يروح يعمل التحاليل اللي هنكتبها لك ونشرحهالك دي

• بياخد او اخد أدوية غير مشروعة عن طريق الحقن الوريدى او الاستنشاق ولو حتي جربها مرة واحدة.

• واحد رايح لدكتور بيشتكي من اي حاجة وفي التحاليل الروتينية بتاعته كانت وظائف الكبد عالية بدون تفسير.

• الاطفال اللي أمهاتهم مصابين بالتهاب الكبد سي او شركاء العلاقة الجنسية لاشخاص مصابين بالتهاب الكبد سي.

• الناس اللى بتشتغل في المجال الصحي المعرضيين لمشتقات الدم المختلفة والوخز بالابر.

• اذا كان مصاب بمرض يخليه ينقل دم كتير زي مرضى انيميا البحر المتوسط .

• بيغسل كلي.

• كان شقي حبتين ودخل السجن قبل كدا.

• اللي اكتشفو انه عنده فيرس نقص المناعة ( الايدز).

• اي حد عمل عمليات قبل سنة 1992.

طيب الشخص اللي عرفناه ده ،هيبتدي منين ؟!

اول حاجة خالص بيتعمل له تحليل نشوف اذا هو فعلا اتعرض لفيرس سي ولا لا وده عن طريق قياس نسبة الاجسام المضادة اللي كونها الجسم لفيرس سي ، مش فاهم !

طيب بص ركز معايا

أي حاجة بتدخل الدم بتقراها نوع من انواع كريات الدم البيضاء وتتعرف عليها واول ما تفسرها انها جسم غريب كفيرس او بكتريا تبدأ تدى اشارات لخلايا تانية تحاول تأكلها وتبلعها وتدى اشارات كمان لخلايا تالتة تطلع اجسام مضادة للجسم ده والاجسام المضادة دى فيه منها بيختفي بعد فترة ويروح او انه يفضل في الجسم دليل علي ان الجسم الغريب ده قد مر من هنا وكأنه حفر اسمه علي حيطة للذكرى مثلا .

الاجسام المضادة اللى يكونها الجسم ضد الفيرس الكبدى سي بتفضل في الجسم مش بتروح ، فإذا الاجسام المضادة طلعت ايجابية ؛يبقي الخطوة اللي بعدها هو الكشف عن الفيرس نفسه في الدم بحاجة كدا اسمها العربي مكلكع شويتين: “تفاعل البلمرة المتسلسل” (PCR).

اذا تحليل تفاعل البلمرة المتسلسل (PCR) طلع ايجابي ، فده تأكيد لوجود الاصابة بفيرس سي مش بس مجرد تعرض عابر للفيرس.

ومن هنا هنبتدى نعمل تحاليل اضافية عشان نحضر المريض للعلاج.

Advertisements
زر الذهاب إلى الأعلى