طب بالعامية

نصائح لتقليل وزنك والحفاظ على صحتك

حضرتك مش هتقرأ و بس ، هتعمل مجهود معانا شوية و أهو بالمرة تحرق سعرات

انت عارف الاول انت وزنك مظبوط ولا زيادة و لا سمين؟

هو فيه فرق بين الوزن الزيادة و السمنة؟!

اه طبعا و ده مش كلامي ، ده كلام منظمة الصحة العالمية

طب أعرف ازاي اذا كان وزني زيادة و لا سمين؟

حسبة بسيطة جدا ، تعرف وزنك كام كيلو و طولك قد ايه بالمتر و تحسب كتلة جسمك

انا مثلا وزني حاليا 85 كجم و طولي 1.75 متر

اقسم بقى وزني على مربع طولي بالمتر

يعني 85 / (1.75 مضروبة في 1.75) = 27.75

الناتج ده بقى لو طلع من 20 الى 25 يبقى انت كده تمام

من 25 الى 30 يبقى انت وزنك زيادة زي حالاتي 🙂 زينا زي 39 % من سكان كوكب الأرض

فوق ال30 يبقى تسلم على حبايبك و تسد الديون اللي عليك و تستعد للي جاي انت و 13 % من سكان الكوكب! ، ده طبعا لو ما لحقتش نفسك من دلوقتي

المطلوب بقى من حضرتك دلوقتي تتعب شوية و تحسب نفس الحسبة دي على وزنك و طولك انت عشان نعرف معانا كام واحد وزنه زياده و كام واحد سمين

طيب بعد ما حسبت الحسبة و طلعت غالبا سمين ، تعمل ايه عشان تنزل لرقم 25؟

بسيطة جدا

يا تزود طولك مترين تلاتة كمان و دي طبعا سهلة! 🙂

يا إما تنزل وزنك و دي صعبة شوية 🙂

قولي على المهم ، انزل وزني ازاي؟

بسيطة جدا ، يا تقلل السعرات اللي بتاخدها يوميا من الاكل ، يا تزود مجهودك يا تعمل الاتنين

نبدأ بالجزء الاول

اقلل السعرات ازاي؟

يا اما تغير نوعية الاكل عشان تعتمد على اكلات سعراتها الحرارية اقل ، و ده اللي الناس بتسميه “الدايت” و ده أنواعه كتير و فيه منه اللي طب و منه اللي عك “و اللي عاوز يعرف الفرق يشوف حلقاتنا على اليوتيوب”

يا أما تقلل كمية الاكل العادي بتاعك تدريجيا و دي طريقة نتيجتها مضمونة و غالبا وزنك هيفضل على الوزن الجديد على طول لانك ببساطة بتغير عاداتك الغذائية كلها للابد مش مجرد بتحرم نفسك للوصول لهدفك

طبعا انت استحملت الرغي ده كله عشان عاوز الخلاصة

دي شوية نصايح هتساعدك على تقليل كمية السعرات اللي بتاخدها يوميا و بالتالي تقلل وزنك بدون أي إحساس بالحرمان

1- قلل كمية بسيطة من كل نوع من أنواع الاكل (معلقتين من رز ، ربع معلقة سكر ، ربع رغيف عيش …. الخ) و استمر على الكمية الجديدة لغاية ما تحس انك اتعودت عليها و بعدين قلل شوية كمان و هكذا لغاية ما توصل للكمية المطلوبة

2- حاول تعيد توزيع الكميات في الوجبة عشان تقلل من السعرات ، يعني تزود معلقتين سلطة و بروتين و تقلل من النشويات و الدهون مع الحفاظ على الكمية نفسها

3- حاول دايما تقعد تاكل مع ناس اكلتها مش كبيرة ، او على اضعف الايمان اقل منك (مش عارف هتلاقي ولا لأ بس دور)

4- تجنب تمام البوفيه المفتوح

5- حاول تتجنب الوجبات السريعة و المشروبات الغازية بقدر الإمكان و لو مش قادر تتجنبهم قلل منهم بالتدريج برضه

6- شارك اللي حواليك في أي حاجة حلوة بتاكلها او تشربها ، عشان تقلل الكمية اللي انت شخصيا هتاكلها

7- بالنسبة للمياه الغازية يا ريت تستبدلها بعصير ، مش قادر؟ مفيش مشكلة ارمي شوية من كل كانز بيبسي تفتحها قبل ما تبدأ تشربها

8- حاول تستعمل اطباق و أدوات طعام حجمها اصغر شوية ، و دي لما تتملي هتديك برضه إحساس بالشبع

9- خلي عزومات الاكل في اكتر يوم بتعمل فيه مجهود في الأسبوع

10 – بعض تطبيقات الموبايلات حاليا بتحسب عدد السعرات اللي بتتناولها طوال اليوم ، بمعنى انك بتبقى عارف انت محتاج كام سعر يوميا عشان تخس و تاكل اللي انت عاوزه طوال اليوم و تسجل اول بأول عىل الموبايل الى ان ينتهي رصيد السعرات المطلوب ، التطبيقات دي مفيدة جدا

النصايح دي لو عملتها كلها او حتى بعضها هتساعدك على تقليل كمية السعرات اللي بتتناولها يوميا بالتدريج و بدون إحساس بالحرمان و لفترة طويلة لانك بتغير عاداتك الغذائية تماما الى عادات افضل مش مجرد بتعمل دايت

و كلها معتمدة على حقيقة علمية مؤكدة ، ان سبب السمنة هو اختلال التوازن بين السعرات و المجهود

د.محمد منصور

دكتور محمد منصور طبيب الباطنة والكلى مستشفيات جامعة ليستر - بريطانيا مؤسس قناة و موقع الدكتور

اترك تعليقاً

زر الذهاب إلى الأعلى