حضرتك عارف ان السرطان هو أكبر سبب للوفيات في العالم؟! طيب ، حضرتك عارف إن الأبحاث اللي بتتعمل على السرطان كل يوم كتير جدا؟ طيب ، حضرتك عارف إن الفتي والعك في الموضوع ده على الفيسبوك والواتساب كتييير جدا جدا جدا؟!
انا هنا مش هقول لك حاجة غير اللي ثبتت بالدراسات القوية ، بس انت إحفظ اللي جاي ده كويس جدا ونفذه بس وربنا يحفظنا جميعا
١- ممنوع التدخين:-تقريبا مفيش سرطان إلا والتدخين بيسببه بشكل أو بآخر ، حتى سرطان الكلى والمثانة! ، -إوعى التدخين السلبي للأسف له نفس التأثير بالظبط!
٢- خلي أكلك صحي:-اعتمد على الخضار والفاكهة في أكلك ، ماتخليش وجبة من غير خضار أو فاكهة ، – اللحوم المصنعة (برجر وسوسيس ولانشون وغيره) ثبت أكيد إنها مرتبطة ببعض السرطانات! ، بعض أنواع الألوان الصناعية ومكسبات الطعم والمواد الحافظة ممكن تكون مرتبطة بالسرطان (بنقول ممكن!) ، فيه دراسات بتقول إن زيت الزيتون البكر والمكسرات ممكن تقلل سرطان الثدي وبعض السرطانات التانية (برضه بنقول ممكن!)
٣- أظبط وزنك:-للأسف السمنة مرتبطة ببعض السرطانات!
٤- إياك والخمور:-سرطانات كتير مرتبطة بكمية الكحول اللي بتشربها!
٥- إلعب رياضة وخليك أكتيف:-حتى لو مشي كل يوم نص ساعة كفاية جدا!
٦- ماتقعدش كتير في الشمس (خصوصا من الظهر للعصر):-مفيش شك إنها بتسبب سرطانات الجلد! ، خليك في الظل على قد ماتقدر في الأوقات اللي الشمس فيها جامدة ، ماتصدقش اللي يقول لك فيتامين دال و فوايدها للعظم!! اللي عايز فيتامين دال يكفيه خمس دقايق كل يوم لما الشمس تكون حنينة! (آه والله الدراسات أثبتت إن خمس دقايق كل يوم كفاية!) ، إلا بالنسبة للأشخاص اللي بشرتهم غامقة أوي.
٧- خد تطعيماتك! تطعيم فايروس بي وتطعيم هيومان بابيلوما فايروس بيحموك فعلا من بعض السرطانات! استشير دكتورك!
٨- لو لك فحص دوري للكشف على السرطان ، إعمله! (فحص البروستاتا وتحليلها عند سن الخمسين للرجالة ، عينة عنق الرحم للبنات ، أشعة ماموجرام على الثدي للبنات اللي عندهم سرطان الثدي في العيلة…..إلخ)
٩- إياك يكون لك علاقات جنسية كتير! ممكن تسبب سرطان عنق الرحم للبنات وممكن تسبب عدوى الإيدز اللي بيجيب سرطان المستقيم في الرجالة!
١٠- إوعى تستعمل حقنة (إبرة) مكان حد!سواء عشان تاخد دوا أو عشان تاخد مخدرات مثلا لو حضرتك بتضرب!!
١١- لو انت أو أي حد تعرفه وزنه نزل بدون سبب أو بقى يعرق جامد بالليل أو طلعله كلكوعة (حلوة كلكوعة دي) في أي مكان في جسمه لازم يروح لدكتور ، ويقول له: هل دي احتمال تكون سرطان؟ (ولو فيه أي حد في عيلتك جاله سرطان ، قول للدكتور ساعتها عشان ياخد باله!)
وربنا يحفظنا جميعا
