طب بالعامية

هو كل أنواع الأنيميا(فقر الدم) نقص حديد؟!

Advertisements

تعالوا نعرف ايه هي الأنيميا الأول! الأنيميا هي نقص كريات الدم الحمراء في الجسم ، و لإن كريات الدم الحمراء هي اللي بتشيل الأكسجين و بتوصله للجسم فلما تقل دا معناه إن الأكسجين اللي واصل لجسمنا حيقل برضو.

طب الأعراض دى؟

ضعف عام ، شحوب ، زيادة ضربات القلب عند القيام بمجهود بسيط ، ضيق التنفس صداع ، برودة في الأطراف ، دوخة كل دي أعراض بسبب إن الأكسجين اللي خلايا جسمنا بتحتاجه لإنتاج الطاقة و القيام بكل العمليات الحيوية قليل.

طيب ايه ممكن يسبب الأنيميا؟

أي نقص في أي عنصر من العناصر اللازمة لتصنيع كريات الدم الحمراء فمثلا كريات الدم الحمراء بتتصنع في نخاع العظم ، و العملية دي محتاجة حاجات كثير منها الحديد و كمان فيتامين ب١٢ و الفوليك أسيد ، فلو أي حاجة من دول نقصت يحصل عندي أنيميا.

أنيميا نقص الحديدو دي هي اللي بتتعالج بمكملات و محاليل الحديد أنيميا نقص فيتامين ب١٢و دي بتتعالج بمكملات و حقن فيتامين ب ١٢ و اللي بعضها بيكون فيها فوليك أسيد برضو ؛ طيب لو مافيش نقص في أي عنصر من دول ايه ثاني ممكن يسبب أنيميا؟

لو معدل تكوين كريات الدم الحمراء قل بسبب مشكلة في نخاع العظم نفسه زي مرض فقر الدم اللاتنسجي ( أو فشل نخاع العظم ) و دا بيكون فيه كل مكونات الدم قليلة مش بس كريات الدم الحمراء لو معدل تكوين كريات الدم الحمراء طبيعي بس معدل تكسيرها هو اللي زيادة و دي اسمها الأنيميا التكسيرية ( أو فقر الدم الانحلالي ) و لها أسباب و أنواع مختلفة كل واحد ليه علاجه.

لذلك لو خفنا يكون عندنا أعراض أنيميا ما نروحش ناخذ حديد على طول و إنما لازم نعمل صورة دم كاملة و يشوفها حد مختص عشان يحدد نوع الأنيميا و العلاج المناسب لها

و دمتم سالمين و أصحاء.

Advertisements
زر الذهاب إلى الأعلى