طب بالعامية

أعراض التهاب المفاصل و المشاكل التى تسببها

بتحس بألم شديد و انت بتتحرك؟ بتسمع من الناس الكبيرة فى السن حواليك ان عندهم خشونة فى الركبة؛ هل هى دى اعراض “التهاب المفاصل”؟!


التهاب المفاصل ده من اشهر الأمراض انتشارا على مستوى العالم ، و ده بيحصل نتيجة تآكل فى الغضاريف الموجودة فى المفاصل دى.


طب يعنى ايه غضاريف؟ الغضاريف دى انسجة مرنة بتبقى موجودة فى منطقة التقاء العظام فى المفاصل و بتمنع الاحتكاك بين العظام و بتساعد على سهولة حركة المفصل.


طب هى ايه اعراض التهاب المفاصل و المشاكل التى يسببها؟
1-ألم شديد اثناء الحركة 2-خشونة فى المفاصل و من اشهرها خشونة الركبة 3-احساس بليونة المفاصل عند الضغط عليها 4-فقدان المرونة و صعوبة الحركة 5-ورم و تضخم فى الأنسجة المحيطة بالمفاصل


عرفنا أن السبب الاساسى لالتهاب المفاصل هو تآكل الغضاريف ، طب ايه اللى ممكن يخلى الغضاريف دى تتآكل؟
1-طبعاً التقدم فى العمر ، 2-الجنس ( وفقا للدراسات ثبت أن السيدات اكثر عرضة للأصابة بالتهاب المفاصل ) ، 3-السمنة أكيد طبعاً! نتجية زيادة الضغط على المفاصل و سرعة تآكل الغضاريف ، 4-التدخين (تقريباً مفيش مصيبة إلا وهتلاقي التدخين له دور فيها) ، 5-بعض العوامل الوراثية اللي مالناش تحكم فيها! (فكر فيها لو كان فيه أكتر من شخص في عيلتك عندهم خشونة شديدة في المفاصل) ، 6-بعض الأمراض مثل مرض السكر و زيادة نسبة ترسب الحديد فى الجسم و المعروف بالهيموكروماتوزيس.


طيب نعمل ايه عشان نحمي نفسنا؟هنتكلم في الموضوع ده بالتفصيل فى بوست تاني ان شاء الله

اترك تعليقاً

زر الذهاب إلى الأعلى