طب بالعامية

الإفراط فى المسكنات!

هل أنت من الأشخاص اللي بياخذوا مسكنات بإفراط ؟! لو أنت كل ما تصدع بتروح تاخذ حباية الصداع الصفراء فالكلام دا ليك.

المسكنات بشكل عام آمنة لو اتاخذت بالطريقة الصحيحة و بعضها ممكن يصرف بدون وصفة طبية ، لكن زي أي دواء الاستخدام المفرِط ليها بيعمل أعراض جانبية ، عشان كدا لازم ناخذ بالنا من بعض النقاط المهمة و احنا بنستخدم المسكنات.

كل المسكنات اللي زي الكاتافلام و الكيتوفان و البروفين و حباية الصداع الصفراء لازم تتاخذ بعد الأكل لإنها ممكن تتعب المعدة و تسبب قرحة لا قدر الله لو اتاخذت على معدة فاضية لفترات طويلة.

لا يُنصح باستخدام المسكنات أكثر من ١٠ أيام بدون الرجوع إلى الطبيب.

لا يُنصح باستخدام المسكنات لمرضى الضغط أوالقلبأو الفشل الكلوي و السيدات الحوامل بدون الرجوع إلى الطبيب.

المسكن الأكثر أمانًا أثناء الحمل هو الباراسيتامول ( بنادول، أبيمول، أدول ، بيترو ) و استخدام المسكّنات الأخرى بالذات في آخر ٣ شهور حمل خطر جدًا على الجنين.

لو أنت بتاخذ دواء للبرد أو التهاب المفاصل أو النقرس استشر الطبيب/الصيدلي قبل ما تاخذ مسكن عشان ما تدخلش في مشاكل جرعة زيادة و بالتالي آثار جانبية أكثر.

لو بتاخذ حاجة للسيولة زي الماريفان برضو ما تاخذش مسكن بدون استشارة لإنه ممكن يزود تأثير الماريفان و يتسبب في نزيف لا قدر الله.

و أخيرا افتكروا دايما إن مش معنى إن الدواء آمن إننا ناخذه بأي جرعة و بأي طريقة.

حافظوا على صحتكم و دمتم سالمين.

اترك تعليقاً

زر الذهاب إلى الأعلى