طب ولا عك

هل بيتم معالجة فيرس سى نهائيا ؟!!

Advertisements

فيه بوستات منتشرة على فيسبوك عن دكاترة (بيتقال انهم متخصصين – بدون أسماء) بيحذرو من علاج فيرس سى اللى بيستعمل في مصر إنه بيتسبب في سرطان الكبد وان “إياكم تاخدو العلاج”!

و تعليقات لناس كتير بتأكد الموضوع!

من نوعية: “أنا والدي اخد العلاج وخف من الفيرس لكن بعدها جاله سرطان في الكبد ومات بسببه” و”حسبي الله ونعم الوكيل” ! و”العالم كله مستني نتيجة التجربة دي عشان هم بيجربو الدوا في المصريين” ….. الخ الخ.

بدون الدخول في تفاصيل كتير ، الكلام ده كله مش مظبوط! وسببه كان ان مجموعة من المرضى اتشخصوا بالمرض الخبيث بعد العلاج فعلا سنة 2017 ، لكن مفيش دليل نهائيا ان العلاج له علاقة بالكانسر.

العلاج اللي بيستعمل حاليا وبيجيب نتائج كويسة جداً ( سوفالدى / سوفوسيبوفير) مش بيتجرب في مصر ولا حاجة!

ده بيستعمل من سنين في العالم كله بعد ما عدى على كل مراحل التجارب المعروفة في المعمل وعلى حيوانات وعلى بشر و مفيش أي دليل محترم انه بيسبب اي سرطان جديد.

المشكلة ان مرضى فيروس الكبدي سي بيكونوا معرضين أكثر من غيرهم لأورام الكبد نتيجة أسباب كتير مش مجالها هنا ، فبعضهم بيتشخص بالورم الخبيث للأسف بعد العلاج ، لكن ده كان هيحصل سواء اتعالج أو لأ ، والدراسات اللي اتعملت على ده مش قليلة.

خلاصة الكلام ، والسبب في البوست ده :-

فايروس سي بقى يعتبر مرض بيتعالج وبيخف تماما في العالم كله.

لو تعرف حد مش عايز يتعالج من الفيرس بسبب الخوف من السرطان ؛ اشرح له ان الموضوع مش صح ، وإنه لازم ياخد العلاج قبل ما الكبد يبوظ تماما!

شير لو تعرف أي مريض بفيرس سى عشان الناس ماتضيعش على نفسها فرصة العلاج والفرصة في حياة طبيعية.

Advertisements

د.محمد منصور

دكتور محمد منصور طبيب الباطنة والكلى مستشفيات جامعة ليستر - بريطانيا مؤسس فناة و موقع الدكتور
زر الذهاب إلى الأعلى